Deputat Bobur Bekmurodov tibbiy niqoblar eksportini taqiqlashni taklif qildi

Oliy Majlis Qonunchilik palatasi deputati, “Yuksalish“ umummilliy harakati raisining o‘rinbosari Bobur Bekmurodov koronavirus xavfining oshib borayotgani sababli O‘zbekistondan tibbiy niqoblarni eksport qilishni taqiqlashni taklif qildi.

“Ortiqcha vahimaga hojat yo‘q, lekin yangi koronavirus bilan kasallanish holatlari 70 dan ziyod davlatda tasdiqlandi va kasallanganlar soni 100 mingga yaqinlashib qoldi. Globalizatsiya sharoitida virusdan izolyatsiyada qolish imkoniyati mavjud emasligi tobora oydinlashib bormoqda”, — deb yozadi deputat.

Shuningdek, Bobur Bekmurodov fuqarolar xavfsizligini ta’minlash maqsadida quyidagi ikkinchi bosqich choralarni ko‘rish vaqti kelganini aytdi:

• Ommaviy tadbirlarni o‘tkazishni cheklash, bolalar va yoshlar ishtirokida ommaviy tadbirlarni taqiqlash;
• transport qatnovlari cheklangan yoki yo‘lovchilarini karantinga olish nazarda tutilgan davlatlar ro‘yxatini keskin kengaytirish;
• virus bilan kurashishga ko‘maklashuvchi dorilar va shaxsiy himoya vositalari (niqoblar, respiratorlar) eksportini taqiqlash va zarur bo‘lsa, xavfsiz davlatlardan importini qo‘llab-quvvatlash;
• farmasevtika bozorini qat’iy nazoratga olish, virusdan himoyalanish va davolash vositalari narxining spekulyativ oshishiga yo‘l qo‘ymaslik;
• yangi koronavirusning oldini olish bo‘yicha tashqi ishlar vaziri, sog‘liqni saqlash vaziri va investitsiya vazirlari ishtirokida Parlament eshituvini o‘tkazish;
• bog‘cha va maktablarda kasallanish xavfini kamaytirishga qaratilgan choralarni kuchaytirish.

Eslatib o‘tamiz, O‘zbekiston koronavirusga qarshi kurashish uchun Xitoyga gumanitar yordamning ikkinchi partiyasini, shu jumladan, tibbiy niqoblarni yubordi. Toshkentda esa 669 million so‘mlik tibbiy niqoblar yashirilgan ombor aniqlandi.

Avvalroq Rossiya tibbiyot niqoblarining mamlakatdan olib chiqib ketilishiga taqiq qo‘ygan edi.

Xitoy Sog‘liqni saqlash milliy komissiyasi mamlakatda 4-mart holatiga ko‘ra, yangi turdagi COVID-19 koronavirusi oqibatida 31 kishi vafot etgani, ushbu kasallik bilan vafot etganlarning jami soni esa 3 mingdan oshib ketgani haqida xabar berdi. Virus yana 139 kishida aniqlangan.

Davolanishga muvaffaq bo‘lgan bemorlar soni 2189 nafarni tashkil qilmoqda, ularga shifoxonadan javob berilgan. Shunday qilib, koronavirusdan davolanishga muvaffaq bo‘lgan bemorlarning jami soni 52 045 kishiga yetdi. Mamlakat bo‘ylab 669 mingdan ortiq odam tekshiruvlardan o‘tkazilgan.

Hozirgi vaqtga kelib Xitoy hududida 80 409 kishi kasallikni o‘ziga yuqtirib olgan bo‘lib, vafot etganlar soni Xitoyda 3012 kishini tashkil etmoqda.