“Manchester Yunayted” tarixidagi eng qimmat 5 ta transfer haqida

“Manchester Yunayted” dunyoning eng qimmat klublaridan biri. Klub bu nomga munosib ravishda doimiy ravishda qimmatbaho transferlarni amalga oshirib keladi. Shunday transferlardan so‘nggisi Brunu Fernandesh xaridi bo‘ldi. “Yunayted” portugaliyalik yarim himoyachi uchun “Sporting”ga 55 million yevro to‘ladi. Bundan tashqari futbolchining natijalariga qarab Lissabon klubi yana 25 million yevroni bonus sifatida qo‘lga kiritishi mumkin. Fernandesh hozircha jamoaga yaxshi kirishib keta oldi. Buni uning ko‘rsatayotgan o‘yini ham statistikasi ham isbotlab turibdi. 6 ta o‘yinda 3 ta gol, 2 ta golli uzatma.

Xo‘sh, “qizil iblislar” so‘nggi yillarda yana qanday qimmatbaho xaridlarni amalga oshirdi? Ular qanchalik o‘ziga sarflangan pullarni oqladi. Quyida Manchester klubi tarixidagi eng qimmatbaho 5 ta transfer haqida gap ketadi.

5. Antoni Marsyal — “Monako”dan 60 mln yevro

Hali 20 yoshga to‘lmagan Antoni Marsyal uchun 2015-yil 1-sentabrida “Yunayted” “Monako”ga 60 million yevrogacha oshishi mumkin bo‘lgan mablag‘ni to‘lashga rozi bo‘ldi. Bu orqali klub bir yil oldin Lyuk Shou orqali (20 yoshga to‘lmagan futbolchi transferi) o‘rnatgan rekordini yangiladi. Antoni “qizil iblislar” safidagi dastlabki mavsumida 49 ta o‘yinda maydonga tushib, 17 ta gol urdi. Bu uning hozirgacha klub safidagi eng yaxshi mavsumi bo‘lib turibdi. Biroq Antoni ushbu natijalarni joriy mavsumda yangilashi mumkin. Hozircha Marsyal 32 ta o‘yinda 15 ta gol urishning uddasidan chiqdi.

4. Anxel di Mariya — “Real”dan 75 mln yevro

Anxel di Mariya Madrid klubidagi qoyilmaqom o‘yinlari orqali muxlislarning yoqimtoyiga aylangandi. Biroq argentinalik futbolchi Ispaniya poytaxtida uning xizmatlari yetarlicha qadrlanmayapti degan fikrga keldi. Bundan esa “Yunayted” foydalanib qoldi. 2014-yil avgustida “Manchester Yunayted” “Real”ga Anxel uchun 75 million yevro to‘ladi. Unga klubda afsonaviy futbolchilar harakat qilgan 7-raqam ishonib topshirildi. Biroq bu raqam Anxel uchun “og‘irlik” qildi. Oradan bir yil o‘tmay, futbolchi Manchesterni tark etishga qaror qildi. Buning uchun u hatto klub bilan mavsumoldi yig‘inlariga borishdan voz kechdi. 2015-yil 2-avgustida futbolchi PSJ klubi a’zosiga aylandi. Parijliklar “farishta” uchun 63 million yevro to‘ladi. Di Mariyaning “Yunayted”dagi ko‘rsatkichlari esa quyidagicha: 32 ta o‘yin, 4 ta gol.

3. Romelu Lukaku — “Everton”dan 84,7 mln yevro

“Manchester Yunayted” so‘nggi yillarda hujumchi xarid qilish uchun katta mablag‘ sarflashga majbur bo‘lmoqda. Ammo yangi hujumchilar uchun sarflanayotgan pullar hozircha o‘zini oqlayapti deb bo‘lmaydi. 2017-yil iyulida Manchester klubi “Everton”dan salkam 85 million yevro evaziga belgiyalik hujumchi Romelu Lukakuni sotib oldi. Klub Romelu bilan 5 yillik shartnoma imzoladi. Lukaku kelishi bilan Ueyn Runi klubdan ketdi, ketganda ham “Everton”ga yo‘l oldi. Futbolchining debyuti Yevropa Superkubogi doirasida “Real”ga qarshi kechdi va u gol urishga erishdi. “Yunayted” safida APLdagi debyutida ham gol urishga erishdi. O‘sha mavsum belgiyalik futbolchi APLda 34 ta o‘yin o‘tkazib, 16 ta gol urdi. Keyingi mavsumda esa Romelu APLda 32 ta o‘yinda 12 ta gol urib, tanqidlar yomg‘iri ostida qolib ketdi. Joze Mourinyo klubni tark etgach, jamoa boshqaruvini Ole-Gunnar Sulsher o‘z qo‘liga oldi. Jamoa hujum chizig‘ida esa Markus Reshford asosiy planga chiqa boshladi. Bundan norozi bo‘lgan Romelu klubni almashtirish payiga tushib qoldi. U 2019-yil yozida Antoni Konte boshqaruvni qo‘lga olgan “Inter”ga yo‘l oldi. “Inter” Lukaku uchun 80 million yevro to‘lashdan qochmadi. Romeluning “Yunayted”dagi umumiy statistikasi esa quyidagi raqamlar bilan yakunlandi: 96 ta o‘yin, 42 ta gol.

2. Harri Maguayr — “Lester”dan 87 mln yevro

Harri “Lester” safidagi ishonchi o‘yinlari orqali Manchester grandlari oromini o‘g‘irladi. “Siti” “Atletik”dan Aymerik Lyaportni xarid qilib, himoyada muammolarni bartaraf etish mumkinligini ishondi va Maguayr variantidan voz kechdi. Shu orqali “Yunayted” Maguayr uchun kurashda asosiy favoritga aylandi. Biroq “qizil iblislar” Harri uchun “tulkilar”ga rekord darajadagi mablag‘ni to‘lashga majbur edi. Boisi “Lester” o‘z himoya ustunini 90 million yevrodan kamiga sotmasligini ma’lum qilib ulgurgandi. Oxiri tomonlar 2019-yil 2-avgustida 87 million yevro mablag‘ ustida bir to‘xtamga keldi. Bu orqali Manchester klubi o‘z tarixidagi eng qimmat ikkinchi xaridga qo‘l urdi. “Lester” esa o‘z tarixidagi eng qimmat sotuvni amalga oshirdi. Umuman olganda bu hayratlanarli summa. Biroq 2018-yil yanvarida “Liverpul” Virjil van Deyk uchun 85 million yevro to‘lab, himoyachilar ham katta mablag‘lar evaziga sotib olinishi mumkinligi va ular ham bu samoviy mablag‘larni oqlay olishini isbotlab qo‘ygandi. Maguayr klubga kelganiga 1 yil to‘lmasidan jamoa sardori darajasigacha ko‘tarildi. Sulsherga jamoani yangidan qurishda eng katta yordamchilardan biri vazifasini o‘tashga harakat qilmoqda. Futbolchi joriy mavsum “Manchester Yunayted” safida jami 39 ta o‘yin o‘tkazib, 2 ta gol urdi. Ha, aytgancha, futbolchi 5-mart kuni o‘zining 27 yoshini qarshi oldi.

1. Pol Pogba — “Yuventus”dan 105 mln yevro

“Qizil iblislar” tarixidagi eng qimmat transfer 2016-yil avgustida amalga oshirilgan. 4 yil avval tekinga qo‘yib yuborilgan Pol Pogba uchun Manchester klubi “Yuventus”ga 105 million yevro to‘ladi. Bu orqali Pol o‘sha vaqtdagi dunyoning eng qimmatbaho futbolchisiga aylandi. Pogba transferida Mino Rayola muhim rol o‘ynagan. Uning Manchesterga o‘tishi ortidan Rayola salkam 27 million yevro ishlab oladi. Pogba hozirgacha jamoaning asosiy yetakchisiga aylana olgani yo‘q. Bunga surunkali jarohatlar va turli nizolar sabab bo‘ldi. Futbolchi bir necha marta “Yunayted”dan ketish istagini bildirdi. Birda “Real”ga yana birda “Yuventus”ga o‘tishi haqida bong urildi. Biroq futbolchi ham Manchester klubida. Faqat yana o‘sha jarohatlar sabab maydon tashqarisida qolmoqda. Pogba “Yunayted”ga qaytgandan beri jami 143 ta o‘yinda maydonga tushib, 31 ta gol urdi. 2016/17-yilgi mavsumda Angliya Liga Kubogi hamda Yevropa Ligasi bosh sovrinini qo‘lga kiritdi.

Mavzuga doir: 

• “Barselona” tarixidagi eng qimmat 5 transfer haqida 
• “Real” tarixidagi eng qimmat 5 ta transfer haqida