«Манчестер Юнайтед» тарихидаги энг қиммат 5 та трансфер ҳақида

«Манчестер Юнайтед» дунёнинг энг қиммат клубларидан бири. Клуб бу номга муносиб равишда доимий равишда қимматбаҳо трансферларни амалга ошириб келади. Шундай трансферлардан сўнггиси Бруну Фернандеш хариди бўлди. «Юнайтед» португалиялик ярим ҳимоячи учун «Спортинг»га 55 миллион евро тўлади. Бундан ташқари футболчининг натижаларига қараб Лиссабон клуби яна 25 миллион еврони бонус сифатида қўлга киритиши мумкин. Фернандеш ҳозирча жамоага яхши киришиб кета олди. Буни унинг кўрсатаётган ўйини ҳам статистикаси ҳам исботлаб турибди. 6 та ўйинда 3 та гол, 2 та голли узатма.

Хўш, «қизил иблислар» сўнгги йилларда яна қандай қимматбаҳо харидларни амалга оширди? Улар қанчалик ўзига сарфланган пулларни оқлади. Қуйида Манчестер клуби тарихидаги энг қимматбаҳо 5 та трансфер ҳақида гап кетади.

5. Антони Марсьяль — «Монако»дан 60 млн евро

Ҳали 20 ёшга тўлмаган Антони Марсьяль учун 2015 йил 1 сентябрида «Юнайтед» «Монако»га 60 миллион еврогача ошиши мумкин бўлган маблағни тўлашга рози бўлди. Бу орқали клуб бир йил олдин Люк Шоу орқали (20 ёшга тўлмаган футболчи трансфери) ўрнатган рекордини янгилади. Антони «қизил иблислар» сафидаги дастлабки мавсумида 49 та ўйинда майдонга тушиб, 17 та гол урди. Бу унинг ҳозиргача клуб сафидаги энг яхши мавсуми бўлиб турибди. Бироқ Антони ушбу натижаларни жорий мавсумда янгилаши мумкин. Ҳозирча Марсьяль 32 та ўйинда 15 та гол уришнинг уддасидан чиқди.

4. Анхель ди Мария — «Реал»дан 75 млн евро

Анхель ди Мария Мадрид клубидаги қойилмақом ўйинлари орқали мухлисларнинг ёқимтойига айланганди. Бироқ аргентиналик футболчи Испания пойтахтида унинг хизматлари етарлича қадрланмаяпти деган фикрга келди. Бундан эса «Юнайтед» фойдаланиб қолди. 2014 йил августида «Манчестер Юнайтед» «Реал»га Анхель учун 75 миллион евро тўлади. Унга клубда афсонавий футболчилар ҳаракат қилган 7-рақам ишониб топширилди. Бироқ бу рақам Анхель учун «оғирлик» қилди. Орадан бир йил ўтмай, футболчи Манчестерни тарк этишга қарор қилди. Бунинг учун у ҳатто клуб билан мавсумолди йиғинларига боришдан воз кечди. 2015 йил 2 августида футболчи ПСЖ клуби аъзосига айланди. Парижликлар «фаришта» учун 63 миллион евро тўлади. Ди Мариянинг «Юнайтед»даги кўрсаткичлари эса қуйидагича: 32 та ўйин, 4 та гол.

3. Ромелу Лукаку — «Эвертон»дан 84,7 млн евро

«Манчестер Юнайтед» сўнгги йилларда ҳужумчи харид қилиш учун катта маблағ сарфлашга мажбур бўлмоқда. Аммо янги ҳужумчилар учун сарфланаётган пуллар ҳозирча ўзини оқлаяпти деб бўлмайди. 2017 йил июлида Манчестер клуби «Эвертон»дан салкам 85 миллион евро эвазига белгиялик ҳужумчи Ромелу Лукакуни сотиб олди. Клуб Ромелу билан 5 йиллик шартнома имзолади. Лукаку келиши билан Уэйн Руни клубдан кетди, кетганда ҳам «Эвертон»га йўл олди. Футболчининг дебюти Европа Суперкубоги доирасида «Реал»га қарши кечди ва у гол уришга эришди. «Юнайтед» сафида АПЛдаги дебютида ҳам гол уришга эришди. Ўша мавсум белгиялик футболчи АПЛда 34 та ўйин ўтказиб, 16 та гол урди. Кейинги мавсумда эса Ромелу АПЛда 32 та ўйинда 12 та гол уриб, танқидлар ёмғири остида қолиб кетди. Жозе Моуриньо клубни тарк этгач, жамоа бошқарувини Оле-Гуннар Сульшер ўз қўлига олди. Жамоа ҳужум чизиғида эса Маркус Рэшфорд асосий планга чиқа бошлади. Бундан норози бўлган Ромелу клубни алмаштириш пайига тушиб қолди. У 2019 йил ёзида Антони Конте бошқарувни қўлга олган «Интер»га йўл олди. «Интер» Лукаку учун 80 миллион евро тўлашдан қочмади. Ромелунинг «Юнайтед»даги умумий статистикаси эса қуйидаги рақамлар билан якунланди: 96 та ўйин, 42 та гол.

2. Ҳарри Магуайр — «Лестер»дан 87 млн евро

Ҳарри «Лестер» сафидаги ишончи ўйинлари орқали Манчестер грандлари оромини ўғирлади. «Сити» «Атлетик»дан Аймерик Ляпортни харид қилиб, ҳимояда муаммоларни бартараф этиш мумкинлигини ишонди ва Магуайр вариантидан воз кечди. Шу орқали «Юнайтед» Магуайр учун курашда асосий фаворитга айланди. Бироқ «қизил иблислар» Ҳарри учун «тулкилар»га рекорд даражадаги маблағни тўлашга мажбур эди. Боиси «Лестер» ўз ҳимоя устунини 90 миллион евродан камига сотмаслигини маълум қилиб улгурганди. Охири томонлар 2019 йил 2 августида 87 миллион евро маблағ устида бир тўхтамга келди. Бу орқали Манчестер клуби ўз тарихидаги энг қиммат иккинчи харидга қўл урди. «Лестер» эса ўз тарихидаги энг қиммат сотувни амалга оширди. Умуман олганда бу ҳайратланарли сумма. Бироқ 2018 йил январида «Ливерпуль» Виржил ван Дейк учун 85 миллион евро тўлаб, ҳимоячилар ҳам катта маблағлар эвазига сотиб олиниши мумкинлиги ва улар ҳам бу самовий маблағларни оқлай олишини исботлаб қўйганди. Магуайр клубга келганига 1 йил тўлмасидан жамоа сардори даражасигача кўтарилди. Сульшерга жамоани янгидан қуришда энг катта ёрдамчилардан бири вазифасини ўташга ҳаракат қилмоқда. Футболчи жорий мавсум «Манчестер Юнайтед» сафида жами 39 та ўйин ўтказиб, 2 та гол урди. Ҳа, айтганча, футболчи 5 март куни ўзининг 27 ёшини қарши олди.

1. Пол Погба — «Ювентус»дан 105 млн евро

«Қизил иблислар» тарихидаги энг қиммат трансфер 2016 йил августида амалга оширилган. 4 йил аввал текинга қўйиб юборилган Пол Погба учун Манчестер клуби «Ювентус»га 105 миллион евро тўлади. Бу орқали Пол ўша вақтдаги дунёнинг энг қимматбаҳо футболчисига айланди. Погба трансферида Мино Райола муҳим рол ўйнаган. Унинг Манчестерга ўтиши ортидан Райола салкам 27 миллион евро ишлаб олади. Погба ҳозиргача жамоанинг асосий етакчисига айлана олгани йўқ. Бунга сурункали жароҳатлар ва турли низолар сабаб бўлди. Футболчи бир неча марта «Юнайтед»дан кетиш истагини билдирди. Бирда «Реал»га яна бирда «Ювентус»га ўтиши ҳақида бонг урилди. Бироқ футболчи ҳам Манчестер клубида. Фақат яна ўша жароҳатлар сабаб майдон ташқарисида қолмоқда. Погба «Юнайтед»га қайтгандан бери жами 143 та ўйинда майдонга тушиб, 31 та гол урди. 2016/17 йилги мавсумда Англия Лига Кубоги ҳамда Европа Лигаси бош совринини қўлга киритди.

Мавзуга доир: 

• «Барселона» тарихидаги энг қиммат 5 трансфер ҳақида 
• «Реал» тарихидаги энг қиммат 5 та трансфер ҳақида