Haftasiga deyarli 5 mlrd so‘m. Haddan tashqari katta maosh olayotgan futbol yulduzlari

Yildan yilga dunyo futbolida pul aylanishi ortsa ortmoqdaki, kamayotgani yo‘q. Homiylar ham har yili ko‘payib borayotgani rost. Shunday ekan, taniqli futbol yulduzlarining avvalgi vaqtlardagidan ko‘proq maosh olayotgani hayratlanarli emas.

Deloitte Football Money League nashri ma’lumotiga ko‘ra, dunyoning top-5 klubi 2018/19-yilgi mavsumda jami hisobda 3,6 milliard dollar ishlab topgan. Bu 2017/18-yilgi mavsumdagi topilgan pullardan 300 million dollarga ko‘p ekanligini anglatadi.

Klubga katta pul keltirayotgan ijrochilar, albatta, yuqori maosh olishga haqli. Biroq hozir dunyo futbolida agentlar o‘z mijozlariga keragidan ortiq maoshni tayinlashga erishmoqda. Ammo o‘sha futbolchilarning ko‘pchiligi samoviy mablag‘larni oqlayotgani yo‘q. Quyidagi haddan ortiq maosh olayotgan futbolchilar haqida gap ketadi.

Mesut O‘zil (“Arsenal”) — haftasiga 350 ming funt

Arsen Vengerning so‘nggi yillarida “Arsenal” transfer bozoridagi siyosati tufayli omma oldidagi obro‘sini tushirib yubordi. Shu boisdan ham “Arsenal” “Real”dan klub uchun rekord mablag‘ evaziga Mesut O‘zilni sotib olganda ko‘pchilik ajablangandi. Avvaliga O‘zilning London klubiga yuqori darajaga ko‘tarilishda yordam bera olishini kutishgandi va bunga ishonishgandi ham. Bunga sabab esa uning Madridda ko‘rsatgan o‘yinlari edi, albatta. U “Real”da foydali o‘yin ko‘rsatar, dunyoning eng kuchli pleymeykerlari ro‘yxatida e’tirof etilardi. “Arsenal”dagi ilk mavsumida O‘zil Tyerri Anri tomonidan o‘rnatilgan bir mavsumdagi eng ko‘p golli uzatmalar bo‘yicha rekordni yangilashiga bir bahya qoldi. 2018-yilda Mesut “to‘pchilar” bilan shartnomasini uzaytirib, APLning eng ko‘p haq to‘lanadigan futbolchisiga aylandi.

Shundan so‘ng O‘zilning ishlari oldinga emas, ortga keta boshladi. U haftasiga 350 ming ishlab topadi, biroq u pullarni oqlayotgani yo‘q. Unai Emeri bilan nizoga borib, asosiy tarkibdagi o‘rnidan ham quruq qoldi. Muxlislar ham O‘zilga ishonmay qo‘ydi. Hozir esa hech narsa qilish kerak emas: “Arsenal” undan qutulish harakatini boshlamaguncha Mesutning ketishga shoshmasligi aniq. Jamoa boshqaruvini qo‘lga olgan Mikel Arteta esa ayni damda O‘zilga imkoniyat taqdim etmoqda. Biroq uning jamoada qolish yoki qolmasligini vaqt ko‘rsatadi.

Tangi Ndombele (“Tottenhem”) — haftasiga 200 ming funt

“Tottenhem” “Lion”dan 62,8 million funtga Tangi Ndombeleni sotib olib, klub rekordini o‘rnatdi. 22 yoshli futbolchi Fransiya chempionatida 2 ta juda yaxshi mavsum o‘tkazdi va Yevropada eng talabgir futbolchilardan biriga aylandi. Tangi klubga kelishi bilanoq jamoaning asosiy yetakchisi Harri Keyn bilan teng miqdorda maosh oladigan bo‘ldi. Bu orqali u Kristian Eriksen hamda Dele Alli kabi “shporlar”ning boshqa yulduzlarni o‘yin borasida bo‘lmasa ham, maosh borasida ortda qoldirdi. Shu bilan birga muxlislar ham unga katta umid bog‘ladi.

Biroq futbolchi jarohat sabab asosiy tarkibdan hozircha muqim o‘rin egallay olganicha yo‘q. Pochettino davrida oz-moz bo‘lsa-da maydonda ko‘rinish bergan Tangiga ayni damda Joze Mourinyo faqat zaxiradan o‘yinga qo‘shilish imkoniyatini taqdim etmoqda, xolos.

Pol Pogba (“Manchester Yunayted”) — haftasiga 290 ming funt

“Manchester Yunayted” 4 yil oldin Pogba bilan shartnoma imzolab, deyarli barcha rekordlarni yangilagandi. O‘sha yili “Old Trafford”da Zlatan Ibrahimovich hamda Joze Mourinyo ham paydo bo‘ldi.

Zlatan va Joze ayni damda boshqa-boshqa klubda Pobga esa hamon “Yunayted” futbolchisi. Polning jamoada qolishini xohlayotganlar ko‘p emas. Uning doimiy mojarolar ortida qolishi va surunkali jarohatlari hammaning joniga tegdi. Ha, fransuzning o‘zi ham klubdan ketishga bir necha marta harakat qilib ko‘rdi. Biroq uning Angliyada olayotgan maoshini har qanday klub ham ko‘tara olmasligi aniq edi.

Pogba ayni chog‘da ham dunyoning eng kuchli yarim himoyachilaridan biri, biroq “Manchester Yunayted”da o‘ynash ishtiyoqning yo‘qligi uning obro‘siga zarar yetkazmoqda.

U 2019/20-yilgi mavsum APL doirasida atigi 7 ta o‘yinda maydonga tushdi. Polning ingliz klubi bilan yana bir yillik shartnomasi bor. Katta ehtimol bilan futbolchi shundan so‘ng boshqa jamoaga o‘tib ketadi.

Usmon Dembele (“Barselona”) — haftasiga 250 ming funt

Usmon Dembele “Barselona”ga Neymarning o‘rinbosari sifatida kelgandi. Bu esa unga qo‘shimcha mas’uliyat yuklashi tabiiy etdi. “Barselona” Dembele uchun “Borussiya Dortmund”ga rekord darajada mablag‘ to‘lagandi. Biroq hozircha futbolchi surunkali jarohatlar sabab asosiy tarkib o‘yinchisiga aylanish tugul, jamoada o‘zini ko‘rsata olganicha yo‘q. U ko‘proq vaqtini maydonda ko‘ra, shifoxonada o‘tkazdi.

Ro‘yxatimizdagi boshqa o‘yinchilardan farqli o‘laroq Dembele maydonda bo‘lgan vaqtlari jamoa uchun ancha foydali harakatlana oldi. Biroq u har doim Kataloniya klubi tomonidan noprofessionallikda ayblab kelindi. Boisi futbolchi mashg‘ulotlarga bir necha bor kech qolib keldi. Futbolchi buning sababini esa uxlab qolgani bilan izohlashda davom etdi.

Joriy mavsum Dembele boshqa maydonga tushmaydi. “Barselona” esa uning o‘rniga 18 million yevro sarflab, mojaralar evaziga “Levante”dan Martin Breytueytni sotib oldi.

Aleksis Sanches (“Inter”/“Manchester Yunayted”) — haftasiga 400 ming funt (qariyb 5 milliard so‘m)

Sanchesning “Manchester Yunayted”ga o‘tishi aniq bo‘lganda, muxlislar o‘zida yo‘q xursand edi. Boisi “Yunayted” Sanches uchun kurashda azaliy raqibi “Siti”ni orta qoldira olgandi. Ammo muxlislarning xursandchiligi uzoqqa cho‘zilmadi. Aleksisning o‘rniga Genrix Mxitaryanni qabul qilib olgan “Arsenal” ham bu transferdan xursand bo‘lmagani aniq. Ikkala futbolchi ham yangi jamoasida asosiy tarkib futbolchisiga aylana olmadi.

“Yunayted” “Man Siti”ni ortda qoldirish yo‘lida Sanchesga haftasiga 400 ming funt maosh taklif qilishga majbur bo‘lgandi. Qayd etish joiz, “qizil iblislar” safida hech bir futbolchi Sancheschalik ko‘p maosh olmaydi.

Chililik hujumchi “Yunayted” safida 45 ta o‘yin o‘tkazib, atigi 5 ta gol urdi, xolos. Hozir esa futbolchi ijara asosida “Inter” safida harakat qilmoqda. Katta ehtimol bilan milanliklar ham Sanches transferini to‘liq sotib olmaydi.

Asror Abdunazarov tarjimasi