Xalqaro olimpiya qo‘mitasi (XOQ) Rossiya terma jamoasi safida uch karra Olimpiya o‘yinlari sovrindori Olga Zabelinskayaga O‘zbekiston bayrog‘ini himoya qilishga ruxsat berdi. Bu haqda XOQ vakili Mark Adams Lozannada bo‘lib o‘tgan ijroqo‘m yig‘ilishida ma’lum qilgan.
Shuningdek, rossiyalik beshkurashchilar Alise Faxrutdinova va Aleksandr Savkin, erkin kurash bo‘yicha Yevropa chempioni Ilyas Bekbulatovga ham O‘zbekiston nomidan Olimpiadada qatnashishga ruxsat berildi. Adamsning so‘zlariga ko‘ra, barcha sportchilar belgilab qo‘yilgan “karantin”siz O‘zbekiston terma jamoasi safiga qo‘shilishi mumkin.
Zabelinskaya 2018-yilda sport fuqaroligini Rossiyadan O‘zbekistonga almashtirgan edi. Shundan keyin u musobaqalarda velosportchilar xalqaro ittifoqi (UCI) nomidan qatnashayotgandi. Biroq Olimpiadada ishtirok etish uchun Milliy olimpiya qo‘mitasi (MOQ) va XOQ ijroqo‘mi qarori lozim edi. Avvalroq O‘zbekiston MOQ Zabelinskaya Tokiodagi Olimpiadada O‘zbekiston nomidan qatnashishi mumkinligini ma’lum qilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)