Ҳафтасига деярли 5 млрд сўм. Ҳаддан ташқари катта маош олаётган футбол юлдузлари

Йилдан йилга дунё футболида пул айланиши ортса ортмоқдаки, камаётгани йўқ. Ҳомийлар ҳам ҳар йили кўпайиб бораётгани рост. Шундай экан, таниқли футбол юлдузларининг аввалги вақтлардагидан кўпроқ маош олаётгани ҳайратланарли эмас.

Deloitte Football Money League нашри маълумотига кўра, дунёнинг топ-5 клуби 2018/19 йилги мавсумда жами ҳисобда 3,6 миллиард доллар ишлаб топган. Бу 2017/18 йилги мавсумдаги топилган пуллардан 300 миллион долларга кўп эканлигини англатади.

Клубга катта пул келтираётган ижрочилар, албатта, юқори маош олишга ҳақли. Бироқ ҳозир дунё футболида агентлар ўз мижозларига керагидан ортиқ маошни тайинлашга эришмоқда. Аммо ўша футболчиларнинг кўпчилиги самовий маблағларни оқлаётгани йўқ. Қуйидаги ҳаддан ортиқ маош олаётган футболчилар ҳақида гап кетади.

Месут Ўзил («Арсенал») — ҳафтасига 350 минг фунт

Арсен Венгернинг сўнгги йилларида «Арсенал» трансфер бозоридаги сиёсати туфайли омма олдидаги обрўсини тушириб юборди. Шу боисдан ҳам «Арсенал» «Реал»дан клуб учун рекорд маблағ эвазига Месут Ўзилни сотиб олганда кўпчилик ажабланганди. Аввалига Ўзилнинг Лондон клубига юқори даражага кўтарилишда ёрдам бера олишини кутишганди ва бунга ишонишганди ҳам. Бунга сабаб эса унинг Мадридда кўрсатган ўйинлари эди, албатта. У «Реал»да фойдали ўйин кўрсатар, дунёнинг энг кучли плеймейкерлари рўйхатида эътироф этиларди. «Арсенал»даги илк мавсумида Ўзил Тьерри Анри томонидан ўрнатилган бир мавсумдаги энг кўп голли узатмалар бўйича рекордни янгилашига бир баҳя қолди. 2018 йилда Месут «тўпчилар» билан шартномасини узайтириб, АПЛнинг энг кўп ҳақ тўланадиган футболчисига айланди.

Шундан сўнг Ўзилнинг ишлари олдинга эмас, ортга кета бошлади. У ҳафтасига 350 минг ишлаб топади, бироқ у пулларни оқлаётгани йўқ. Унаи Эмери билан низога бориб, асосий таркибдаги ўрнидан ҳам қуруқ қолди. Мухлислар ҳам Ўзилга ишонмай қўйди. Ҳозир эса ҳеч нарса қилиш керак эмас: «Арсенал» ундан қутулиш ҳаракатини бошламагунча Месутнинг кетишга шошмаслиги аниқ. Жамоа бошқарувини қўлга олган Микель Артета эса айни дамда Ўзилга имконият тақдим этмоқда. Бироқ унинг жамоада қолиш ёки қолмаслигини вақт кўрсатади.

Танги Ндомбеле («Тоттенҳэм») — ҳафтасига 200 минг фунт

«Тоттенҳэм» «Лион»дан 62,8 миллион фунтга Танги Ндомбелени сотиб олиб, клуб рекордини ўрнатди. 22 ёшли футболчи Франция чемпионатида 2 та жуда яхши мавсум ўтказди ва Европада энг талабгир футболчилардан бирига айланди. Танги клубга келиши биланоқ жамоанинг асосий етакчиси Ҳарри Кейн билан тенг миқдорда маош оладиган бўлди. Бу орқали у Кристиан Эриксен ҳамда Деле Алли каби «шпорлар»нинг бошқа юлдузларни ўйин борасида бўлмаса ҳам, маош борасида ортда қолдирди. Шу билан бирга мухлислар ҳам унга катта умид боғлади.

Бироқ футболчи жароҳат сабаб асосий таркибдан ҳозирча муқим ўрин эгаллай олганича йўқ. Почеттино даврида оз-моз бўлса-да майдонда кўриниш берган Тангига айни дамда Жозе Моуриньо фақат захирадан ўйинга қўшилиш имкониятини тақдим этмоқда, холос.

Пол Погба («Манчестер Юнайтед») — ҳафтасига 290 минг фунт

«Манчестер Юнайтед» 4 йил олдин Погба билан шартнома имзолаб, деярли барча рекордларни янгилаганди. Ўша йили «Олд Траффорд»да Златан Ибраҳимович ҳамда Жозе Моуриньо ҳам пайдо бўлди.

Златан ва Жозе айни дамда бошқа-бошқа клубда Побга эса ҳамон «Юнайтед» футболчиси. Полнинг жамоада қолишини хоҳлаётганлар кўп эмас. Унинг доимий можаролар ортида қолиши ва сурункали жароҳатлари ҳамманинг жонига тегди. Ҳа, французнинг ўзи ҳам клубдан кетишга бир неча марта ҳаракат қилиб кўрди. Бироқ унинг Англияда олаётган маошини ҳар қандай клуб ҳам кўтара олмаслиги аниқ эди.

Погба айни чоғда ҳам дунёнинг энг кучли ярим ҳимоячиларидан бири, бироқ «Манчестер Юнайтед»да ўйнаш иштиёқнинг йўқлиги унинг обрўсига зарар етказмоқда.

У 2019/20 йилги мавсум АПЛ доирасида атиги 7 та ўйинда майдонга тушди. Полнинг инглиз клуби билан яна бир йиллик шартномаси бор. Катта эҳтимол билан футболчи шундан сўнг бошқа жамоага ўтиб кетади.

Усмон Дембеле («Барселона») — ҳафтасига 250 минг фунт

Усмон Дембеле «Барселона»га Неймарнинг ўринбосари сифатида келганди. Бу эса унга қўшимча масъулият юклаши табиий этди. «Барселона» Дембеле учун «Боруссия Дортмунд»га рекорд даражада маблағ тўлаганди. Бироқ ҳозирча футболчи сурункали жароҳатлар сабаб асосий таркиб ўйинчисига айланиш тугул, жамоада ўзини кўрсата олганича йўқ. У кўпроқ вақтини майдонда кўра, шифохонада ўтказди.

Рўйхатимиздаги бошқа ўйинчилардан фарқли ўлароқ Дембеле майдонда бўлган вақтлари жамоа учун анча фойдали ҳаракатлана олди. Бироқ у ҳар доим Каталония клуби томонидан нопрофессионалликда айблаб келинди. Боиси футболчи машғулотларга бир неча бор кеч қолиб келди. Футболчи бунинг сабабини эса ухлаб қолгани билан изоҳлашда давом этди.

Жорий мавсум Дембеле бошқа майдонга тушмайди. «Барселона» эса унинг ўрнига 18 миллион евро сарфлаб, можаралар эвазига «Леванте»дан Мартин Брэйтуэйтни сотиб олди.

Алексис Санчес («Интер»/«Манчестер Юнайтед») — ҳафтасига 400 минг фунт (қарийб 5 миллиард сўм)

Санчеснинг «Манчестер Юнайтед»га ўтиши аниқ бўлганда, мухлислар ўзида йўқ хурсанд эди. Боиси «Юнайтед» Санчес учун курашда азалий рақиби «Сити»ни орта қолдира олганди. Аммо мухлисларнинг хурсандчилиги узоққа чўзилмади. Алексиснинг ўрнига Генрих Мхитарянни қабул қилиб олган «Арсенал» ҳам бу трансфердан хурсанд бўлмагани аниқ. Иккала футболчи ҳам янги жамоасида асосий таркиб футболчисига айлана олмади.

«Юнайтед» «Ман Сити»ни ортда қолдириш йўлида Санчесга ҳафтасига 400 минг фунт маош таклиф қилишга мажбур бўлганди. Қайд этиш жоиз, «қизил иблислар» сафида ҳеч бир футболчи Санчесчалик кўп маош олмайди.

Чилилик ҳужумчи «Юнайтед» сафида 45 та ўйин ўтказиб, атиги 5 та гол урди, холос. Ҳозир эса футболчи ижара асосида «Интер» сафида ҳаракат қилмоқда. Катта эҳтимол билан миланликлар ҳам Санчес трансферини тўлиқ сотиб олмайди.

Асрор Абдуназаров таржимаси