Do‘ppilar, planshet tutgan senator ayollar, mehmonga chaqirilgan yoshlar: Senatning ikkinchi yalpi majlisidan fotoreportaj

Toshkentda 28-fevral kuni O‘zbekiston Senatining ikkinchi yalpi majlisi bo‘lib o‘tdi. Unda 18 ta masala, shu jumladan, 9 ta qonun ko‘rib chiqildi. “Daryo” muxbiri Madina Nurman Senat yalpi majlisidan fotoreportaj tayyorladi.

Ma’lumot uchun, yalpi majlisda Senat a’zolari yangi tahrirdagi “O‘zbekiston Respublikasining fuqaroligi to‘g‘risida”gi, “Aholini ro‘yxatga olish to‘g‘risida”gi, yangi tahrirdagi “Metrologiya to‘g‘risida”gi, “Xalqaro tijorat arbitraji to‘g‘risida”gi (ushbu qonun rad etildi), “Mahalla tizimi xodimlari kunini belgilash to‘g‘risida”gi, “Bola huquqlarining qo‘shimcha kafolatlari belgilanishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi, “Sud ishlarini yuritish tartibi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi, “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi, “Xalqaro xususiy huquq bo‘yicha Gaaga konferensiyasi Ustavini (Gaaga, 1951-yil 31-oktabr) ratifikatsiya qilish haqida”gi qonunlarni ko‘rib chiqdi.

So‘ngra Prezident Shavkat Mirziyoyevining “Jamiyatda ijtimoiy-ma’naviy muhitni sog‘lomlashtirish, mahalla institutini yana-da qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida”gi farmonini tasdiqlash, Tibbiy-mehnat ekspert komissiyalari tomonidan fuqarolarni tibbiy ko‘rikdan o‘tkazish va nogironlikni aniqlash masalalari yuzasidan hukumatga parlament so‘rovi yuborish masalalari yuzasidan tegishli qarorlar qabul qildi.

Shundan so‘ng senatorlar O‘zbekiston ichki ishlar vazirining huquqbuzarliklarning oldini olish va ularning profilaktikasi holati to‘g‘risidagi 2019-yil yakuni bo‘yicha axborotini, Tashqi ishlar vazirligining 2019-yildagi faoliyati to‘g‘risidagi axborotni ham eshitdi.

Shundan so‘ng senatorlar ota-onalar qarovisiz qolgan, Mehribonlik uylarida tarbiyalangan yoshlarning jamiyatga ijtimoiy moslashuvidagi dolzarb masalalar to‘g‘risida, shuningdek, davlat bojxona xizmati organlari tomonidan qonun hujjatlarining ijro etilishi va Toshkent viloyatidagi chegara bojxona postlari faoliyatini o‘rganish holati yuzasidan hukumatga yuborilgan parlament so‘rovlari natijalarini ko‘rib chiqdi. Majlis yakunida Oliy sud tarkibiga o‘zgartishlar kiritish masalasi ham ko‘rib chiqildi.