Дўппилар, планшет тутган сенатор аёллар, меҳмонга чақирилган ёшлар: Сенатнинг иккинчи ялпи мажлисидан фоторепортаж

Тошкентда 28 февраль куни Ўзбекистон Сенатининг иккинчи ялпи мажлиси бўлиб ўтди. Унда 18 та масала, шу жумладан, 9 та қонун кўриб чиқилди. «Дарё» мухбири Мадина Нурман Сенат ялпи мажлисидан фоторепортаж тайёрлади.

Маълумот учун, ялпи мажлисда Сенат аъзолари янги таҳрирдаги «Ўзбекистон Республикасининг фуқаролиги тўғрисида»ги, «Аҳолини рўйхатга олиш тўғрисида»ги, янги таҳрирдаги «Метрология тўғрисида»ги, «Халқаро тижорат арбитражи тўғрисида»ги (ушбу қонун рад этилди), «Маҳалла тизими ходимлари кунини белгилаш тўғрисида»ги, «Бола ҳуқуқларининг қўшимча кафолатлари белгиланиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги, «Суд ишларини юритиш тартиби такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги, «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги, «Халқаро хусусий ҳуқуқ бўйича Гаага конференцияси Уставини (Гаага, 1951 йил 31 октябрь) ратификация қилиш ҳақида»ги қонунларни кўриб чиқди.

Сўнгра Президент Шавкат Мирзиёевининг «Жамиятда ижтимоий-маънавий муҳитни соғломлаштириш, маҳалла институтини яна-да қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида»ги фармонини тасдиқлаш, Тиббий-меҳнат эксперт комиссиялари томонидан фуқароларни тиббий кўрикдан ўтказиш ва ногиронликни аниқлаш масалалари юзасидан ҳукуматга парламент сўрови юбориш масалалари юзасидан тегишли қарорлар қабул қилди.

Шундан сўнг сенаторлар Ўзбекистон ички ишлар вазирининг ҳуқуқбузарликларнинг олдини олиш ва уларнинг профилактикаси ҳолати тўғрисидаги 2019 йил якуни бўйича ахборотини, Ташқи ишлар вазирлигининг 2019 йилдаги фаолияти тўғрисидаги ахборотни ҳам эшитди.

Шундан сўнг сенаторлар ота-оналар қаровисиз қолган, Меҳрибонлик уйларида тарбияланган ёшларнинг жамиятга ижтимоий мослашувидаги долзарб масалалар тўғрисида, шунингдек, давлат божхона хизмати органлари томонидан қонун ҳужжатларининг ижро этилиши ва Тошкент вилоятидаги чегара божхона постлари фаолиятини ўрганиш ҳолати юзасидан ҳукуматга юборилган парламент сўровлари натижаларини кўриб чиқди. Мажлис якунида Олий суд таркибига ўзгартишлар киритиш масаласи ҳам кўриб чиқилди.