O‘zbekiston sog‘liqni saqlash vaziri koronavirus muhokamasiga bag‘ishlangan videoselektor yig‘ilishi o‘tkazdi

Sog‘liqni saqlash vazirligida yangi turdagi koronavirus infeksiyasi bo‘yicha epidemik vaziyat va kasallik tarqalishining oldini olish chora-tadbirlariga bag‘ishlangan videoselektor yig‘ilishi bo‘lib o‘tdi. Unda vazirlikning markaziy apparati mas’ullari, respublika davolash muassasalari rahbarlari, oliy tibbiy ta’lim o‘quv yurtlari rektorlari va vazirlikning hududlardagi quyi tizim mutaxassislari bilan birga Jahon sog‘liqni saqlash tashkilotining mamlakatimizdagi vakolatxonasi vakillari ishtirok etdi. Bu haqda SSV jamoatchilik bilan aloqalar bo‘limi xabar bergan.

Alisher Shodmonov rahbarligida o‘tkazilgan mazkur videoselektorda dunyodagi ana shunday murakkab epidemik vaziyatdan kelib chiqib, mamlakatimizda bu borada olib borilayotgan chora tadbirlar, jumladan, joriy 29-yanvarda qabul qilingan “O‘zbekiston Respublikasiga koronavirusning yangi turi kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasini tashkil etish to‘g‘risida”gi Prezident farmoyishida ko‘zda tutilgan vazifalar tahlil qilindi. Koronavirus infeksiyasini oldini olish bo‘yicha profilaktik va epidemiyaga qarshi kurash tadbirlari bo‘yicha mavjud masala va amalga oshirilishi dolzarb bo‘lgan vazifalar muhokama qilindi.

Ayni paytda mamlakatimizga yuqumli kasalliklar, jumladan, COVID19 infeksiyasini kirib kelishini oldini olish maqsadida, davlat chegaralarida 53 ta sanitariya-karantin punktlari (SKP) xalqaro talab va mezonlar asosida faoliyat ko‘rsatmoqda. Bugungi kunda ushbu SKPlarda boshqa tarmoq xodimlari qatorida 250 nafardan ziyod yuqori malakali sanitariya-epidemiologiya xizmati mas’ullari belgilangan standartlar bo‘yicha ish olib bormoqda. Yurtimizga koronavirusni aniqlash bo‘yicha zamonaviy test-sistemalari, shuningdek, tibbiyot xodimlari uchun shaxsiy himoya vositalari, tibbiy texnika va tibbiy buyumlar zahirasi yaratilmoqda. Sog‘liqni saqlash vazirligi va Sanitariya-epidemiologik osoyishtaligi agentligi huzurida uzluksiz 24 soat davomida faoliyat ko‘rsatuvchi shtab tashkil qilingan. Jahon sog‘liqni saqlash tashkiloti bilan mustahkam hamkorlik aloqalari o‘rnatilgan.

2020-yilning 15-yanvaridan - 26-fevraligacha bo‘lgan muddatda Xitoy Xalq Respublikasidan kelgan 5 022 nafar fuqaro ro‘yxatga olingan bo‘lib, ularning 14 kunlik tibbiy kuzatuv davri yakunlangan. Hozirgacha mamlakatimizda koronavirus infeksiyasi bilan kasallanish holati qayd etilmagan.

Mamlakatimizdagi barcha havo va temir yo‘llarda tashkil qilingan sanitariya-karantin punktlari, hududlarda tuzilgan shtablar faoliyatini bugungi kun talabidan kelib chiqib, qayta ko‘rib chiqish, mehmonxonalar va korxonalar, mahalla, ichki ishlar organlari bilan mustahkam hamkorlikni yo‘lga qo‘yish va ularga davlat tomonidan qo‘yilayotgan talab, tavsiyalarni o‘z vaqtida yetkazish, tibbiy-patronaj xizmatini yanada yaxshilash yuzasidan mas’ullarga aniq topshiriq va ko‘rsatmalar berildi.

Ayniqsa, epidemiya keng tarqalgan mamlakatlardan kelgan har bir fuqaroni to‘liq 14 kunlik tibbiy kuzatuvga olish, birlamchi tibbiyot muassasalarining vrach va patronaj hamshiralari tomonidan gripp, O‘RI va o‘tkir pnevmoniya kasalliklarini erta aniqlash ishlarini tizimli tashkil etish bo‘yicha vazifalar yana bir bor qat’iy ko‘rsatib o‘tildi. Shu bilan birga, xorijdan kelgan fuqarolar orasida tana harorati ko‘tarilgan bemorlar aniqlanganda, ularni barchasini koronavirus kasalligiga maxsus laboratoriya tekshiruvidan o‘tkazishga, shuningdek, kasallikning tarqalishini oldini olish va izolyatsiya qilish maqsadida, oilaviy poliklinika shifokorlari tomonidan harorati yuqori bo‘lgan bemorlarni uyida tibbiy yordam ko‘rsatilishiga alohida e’tibor qaratish kerakligiga urg‘u berildi, deyiladi xabarda.

Avval, 27-fevral, payshanba kuni, Seuldan kelgan HY514 reysi yo‘lovchilari Toshkent aeroporti xalqaro terminalining alohida zalida vaqtincha sanitariya izolyatsiyasiga joylashtirilgani, samolyot yo‘lovchilarining izolyatsiyasi bo‘yicha xabar berilgan. Ma’lum bo‘lishicha, Janubiy Koreyaning Seul shahridan Toshkentga uchgan samolyot bortida bir yo‘lovchining salomatligi yomonlashganligi sababli samolyot soat 20:55 da Seul aeroportiga qaytarilgan. Shundan so‘ng samolyot Toshkentga 232 nafar yo‘lovchi, 12 nafar ekipaj a’zosi bilan jami 244 nafar fuqaro uchgan va 27-fevral kuni poytaxt aeroportiga kelib qo‘ngan.

Saudiya Arabistoni Tashqi ishlar vazirligi bayonotiga ko‘ra, mamlakat rasmiylari Makka shahrida Umra amalini bajarish va Madinada Nabaviy masjidini ziyorat qilish uchun keladigan fuqarolarning Saudiya Arabistoniga kirishini vaqtincha to‘xtatishga qaror qilgan. Ushbu chora koronavirusga qarshi kurash doirasida amalga oshirilayotganibildirilgan.

Vazirlar Mahkamasi huzuridagi Din ishlari bo‘yicha qo‘mita Umra vizasining berilishi vaqtincha to‘xtatilganini ma’lum qildi. Saudiya Arabistoni podshohligi Haj va Umra vazirligi 2020-yil 27-fevral kunidan e’tiboran dunyoning barcha mamlakatlari uchun Umra vizasi taqdim etishni vaqtincha to‘xtatgan.