Oliy Majlis Senatining Xotin-qizlar va gender tenglik masalalari qo‘mitasi tomonidan 27-fevral, payshanba kuni, o‘tkazilgan navbatdagi majlisda bir qancha masalalar muhokama qilindi. Xususan, qo‘mita a’zolari “Mahalla tizimi xodimlari kunini belgilash to‘g‘risida”gi O‘zbekiston Respublikasi qonunini dastlabki tarzda ko‘rib chiqdi.
Majlisda ta’kidlanishicha, ushbu hujjatning ishlab chiqilishi mahalla institutini yanada isloh qilish borasida qo‘yilgan navbatdagi muhim qadam bo‘ldi. Qonunga ko‘ra, 22 mart — Mahalla tizimi xodimlari kuni etib belgilanishi ko‘zda tutilgan.
Yig‘ilishda nutq so‘zlagan mahalla va oilani qo‘llab-quvvatlash vazirining birinchi o‘rinbosari Elmira Bositxonova mazkur qonunning qabul qilinishi mahalla faollari uchun rag‘bat, ularning yurt farovonligi yo‘lidagi xizmatlarining o‘ziga xos e’tirofi bo‘lishini aytib o‘tdi.
Vazirlik rasmiysining fikricha, bundan buyog‘iga MFY xodimlarining majburiy mehnat va vakolatiga kirmagan turli ishlarga jalb qilinishiga chek qo‘yiladi.
“Endilikda fuqarolarning muammolari mahalla raisi yoki faollari yelkasida qolmaydi. Bu borada davlat va jamoat tashkilotlari mahallaga tirgak bo‘ladi. Aytayotgan gaplarim balandparvoz so‘zlar emas, har biri bosqichma-bosqich bajariladigan vazifalar. Oldin raislarda bitta ham o‘rinbosar yo‘q edi. Hozir esa uchta: xotin-qizlar, bandlik va huquq-tartibot masalalari bo‘yicha o‘rinbosar lavozimlari joriy qilindi. Ular vakolatidan kelib chiqib, vazifasini bajargan holda mazkur masalalardagi muammolarga yechim topadi. Bu jarayonda vazirlik ham yaqindan yordamlashadi.
Shuni alohida ta’kidlash joizki, o‘zini o‘zi boshqarish organi o‘z fuqarolari va kengashdan boshqa hech kimga bo‘ysunmaydi. Vazirlikning tashkil etilishiga sabab bo‘lgan eng katta omillardan biri ham mana shu aslida. Bundan buyon mahalla raisi va mahallaning kuchli insonlarini hokimlar hamda boshqa tashkilotlar o‘z ishiga jalb qilolmaydi, bunga chek qo‘yiladi. Vazirlik ana shu aralashuvlar, majburiyatlarga nuqta qo‘yadi. Bu farmonda ham aniq belgilangan. Hamma gap bizning ijroyimizda. Farmonda belgilangan 32 ta bandning barchasi so‘zsiz bajariladi. Mazkur jarayonda hammamiz baravar harakat qilishimiz kerak, jumladan, ommaviy axborot vositalari ham”, — dedi Elmira Bositxonova, deya uning so‘zlarini keltirmoqda “Daryo” muxbiri Mirolim Isajonov.
Izoh (0)