O‘zbekiston Sog‘liqni saqlash vazirligida yangi turdagi koronavirus infeksiyasi bo‘yicha epidemik vaziyat va kasallik tarqalishining oldini olish chora-tadbirlariga bag‘ishlangan videoselektor yig‘ilishi bo‘lib o‘tdi, deya xabar bermoqda vazirlikning Jamoatchilik bilan aloqalar bo‘limi.
Yig‘ilishda, jumladan, Prezident Shavkat Mirziyoyev 29-yanvardagi “O‘zbekiston Respublikasiga koronavirusning yangi turi kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasini tashkil etish to‘g‘risida”gi farmoyishida ko‘zda tutilgan vazifalar tahlil qilingan.
Ma’lum qilishlaricha, O‘zbekistonga COVID-19 infeksiyasining kirib kelishini oldini olish maqsadida chegaradagi 53 ta sanitariya-karantin punkti (SKP) xalqaro talab va mezonlar asosida faoliyat ko‘rsatmoqda. Bugungi kunda ushbu SKPlarida boshqa tarmoq xodimlari qatorida 250 nafardan ziyod yuqori malakali sanitariya-epidemiologiya xizmati mas’ullari belgilangan standartlar bo‘yicha ish olib bormoqda.
“Yurtimizga koronavirusni aniqlash bo‘yicha zamonaviy test-sistemalari olib kelingan, shuningdek, tibbiyot xodimlari uchun shaxsiy himoya vositalari, tibbiy texnika va tibbiy buyumlar zahirasi yaratilmoqda. Vazirlik va Sanitariya-epidemiologik osoyishtaligi agentligi huzurida tun-u kun faoliyat ko‘rsatuvchi shtab tashkil qilingan. Jahon sog‘liqni saqlash tashkiloti bilan mustahkam hamkorlik aloqalari o‘rnatilgan”, — deyiladi xabarda.
Ma’lumotlarga ko‘ra, 15-yanvardan 26 fevralgacha bo‘lgan muddatda Xitoydan O‘zbekistonga kelgan 5 022 nafar fuqaro ro‘yxatga olingan bo‘lib, ularning 14 kunlik tibbiy kuzatuv davri yakunlangan. Hozirgacha O‘zbekistonda koronavirus infeksiyasi bilan kasallanish holati qayd etilmadi.
“Ammo bundan xotirjam bo‘lishga asos yo‘q, deyildi selektorda. Mamlakatimizdagi barcha havo va temir yo‘llarda tashkil qilingan SKPlar, hududlarda tuzilgan shtablar faoliyatini bugungi kun talabidan kelib chiqib, qayta ko‘rib chiqish, mehmonxonalar va korxonalar, mahalla, ichki ishlar organlari bilan mustahkam hamkorlikni yo‘lga qo‘yish va ularga davlat tomonidan qo‘yilayotgan talab, tavsiyalarni o‘z vaqtida yetkazish, tibbiy-patronaj xizmatini yanada yaxshilash yuzasidan mas’ullarga aniq topshiriq va ko‘rsatmalar berildi”, — deyiladi vazirlik axborotida.
Ayniqsa, epidemiya keng tarqalgan mamlakatlardan kelgan har bir fuqaroni to‘liq 14 kunlik tibbiy kuzatuvga olish, birlamchi tibbiyot muassasalarining vrach va patronaj hamshiralari tomonidan gripp, O‘RVI va o‘tkir pnevmoniya kasalliklarini erta aniqlash ishlarini tizimli tashkil etish bo‘yicha vazifalar yana bir bor qat’iy ko‘rsatib o‘tilgan.
Shu bilan birga, xorijdan kelgan fuqarolar orasida tana harorati ko‘tarilgan bemorlar aniqlanganda, ularning barchasini koronavirus kasalligiga maxsus laboratoriya tekshiruvidan o‘tkazishga, shuningdek, kasallikning tarqalishini oldini olish va izolyatsiya qilish maqsadida oilaviy poliklinika shifokorlari tomonidan harorati yuqori bo‘lgan bemorlarga uyida tibbiy yordam ko‘rsatilishiga alohida e’tibor qaratilishi ta’kidlab o‘tildi.
So‘nggi ma’lumotlarga qaraganda, jahonda koronavirus infeksiyasi bilan kasallanganlar soni 82 ming nafardan oshdi, shundan 2 800 dan ortiq o‘lim holati ro‘yxatga olindi. Hozirgacha Xitoydan tashqari ushbu infeksiya 50 ga yaqin davlatda aniqlandi.
Izoh (0)