Toshkent hokimligi matbuot xizmati rahbari — hokimning axborot siyosati bo‘yicha maslahatchisi lavozimiga Furqat Sidiqxo‘jayevich Mahmudxo‘jayev tayinlandi, deya xabar qilgan Toshkent shahar hokimligi matbuot xizmati.
Mahmudxo‘jayev tayinlovga qadar Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Toshkent shahar kengashi raisi lavozimida faoliyat ko‘rsatgan.
1965-yilda tug‘ilgan Furqat Mahmudxo‘jayev 1989-yilda Toshkent davlat texnika universitetini muhandis-texnolog mutaxassisligi bo‘yicha hamda Toshkent kimyo texnologiya instituti aspiranturasini tamomlagan (1989 — 1991-yillar). O‘zbekiston yoshlar ittifoqi Mirobod tuman qo‘mitasining birinchi kotibi (1996−2001-yillar), “Kamolot”ning Toshkent shahar bo‘limi raisi (2001−2006-yillar), Taekvon-do ITF milliy assotsiatsiyasi vitse-prezidenti (2006−2008-yillar), “Poytaxt Jamoli" Xalqaro biznes markazi korxonasi direktori (2007−2009-yillar) lavozimlarida ishlagan.
Bundan tashqari, u “O‘zbeknavo” estrada birlashmasi bosh mutaxassisi, bo‘lim boshlig‘i (2009−2010-yillar), “O‘zbeknavo” bosh direktorining o‘rinbosari (2010−2012-yillar), “Mahalla” jamg‘armasi Toshkent shahar bo‘limi raisining o‘rinbosari (2012−2013-yillar), Toshkent shahar hokimligi huzuridagi Ma’naviyat va ma’rifat markazi rahbari (2013−2017-yillar), Vazirlar Mahkamasining madaniyat, san’at va yoshlar siyosati bo‘yicha axborot-tahlil departamenti yetakchi mutaxassisi (2017−2018-yillar) lavozimlarida faoliyat ko‘rsatgan.
Eslatib o‘tamiz, 2018-yil fevralidan 2019-yil apreligacha Toshkent shahar hokimligi matbuot xizmatiga Husniddin Ergashev rahbarlik qildi. U MTRKga qaytib “Yoshlar” teleradiokanalida ish boshlaganidan buyon ushbu lavozim vakant bo‘lib qolayotgan edi.
Toshkent hokimligi matbuot xizmati rahbari — hokimning axborot siyosati bo‘yicha maslahatchisi, shuningdek uning matbuot kotibi ham hisoblanadi.
Izoh (0)