O‘zbekiston koronavirus infeksiyasi tarqalishi munosabati bilan Xitoydan kelishi mumkin bo‘lgan minglab sayyohlardan ayrilgani haqida avval xabar berilgan edi. Xitoyning bir necha shaharlari bilan muntazam reyslarning to‘xtatilishi O‘zbekiston turizm sohasiga ta’sir ko‘rsatgan yagona salbiy omil sifatida ko‘rsatilgan edi.
2019-yilda O‘zbekistonga 61,9 ming nafar xitoylik sayyoh kelgan, 2020-yilda ularning soni 98 ming nafargacha ko‘payishi kutilayotgan edi. “Epidemiya sababli xitoylik turistlar soni kamayishi tabiiy”, — dedi Turizmni rivojlantirish davlat qo‘mitasi departament boshlig‘i Shuhrat Isaqulov.
Xitoylik sayyohlarning kelmasligi ortidan paydo bo‘lishi mumkin bo‘lgan zararlar o‘rnini Turizmni rivojlantirish davlat qo‘mitasi qo‘shni mamlakatlar bilan aloqani mustahkamlash hisobiga to‘ldirmoqchi. Xususan, Rossiya, Qozog‘iston, Turkmaniston va Tojikistondan sayyohlik oqimi o‘sishi kutilmoqda.
Qo‘mita ko‘zda tutilgan rejalarni amalga oshirish uchun 2020-yilning aprel—may oylarida qo‘shni mamlakatlarda mahalliy turizm sohasi vakillari ishtirokida bir qator tadbirlar o‘tkazadi. Bundan tashqari, Turizmni rivojlantirish davlat qo‘mitasi O‘zbekistonni koronavirusdan xoli mamlakat sifatida targ‘ib qilmoqchi.
“O‘tgan yili Xitoyga 36 million sayyoh tashrif buyurgan edi. Uquv bilan marketing siyosati olib borilsa, ushbu oqimni mamlakatimizga yo‘naltirishimiz mumkin, biz buni birorta ham koronavirus holati aniqlanmagan mamlakat sifatida amalga oshirishimiz mumkin”, — deya qayd etdi Shuhrat Isaqulov.
Qo‘mita vakillarining so‘zlariga ko‘ra, turfirmalar Xitoy, Janubiy Koreya yoki Yaponiyaga safarlarning bekor qilinishi munosabati bilan sayyohlarning O‘zbekistonga qiziqish bildirayotgani haqida xabar berishni boshlagan.
Izoh (0)