Xitoyning Shandun provinsiyasi Szinin shahrida joylashgan Jenchen qamoqxonasida koronavirus infeksiyasi bilan ommaviy kasallanish holati aniqlandi. Bu haqda mahalliy ma’muriyat bayonotiga asoslanib, “Sinxua” agentligi xabar bermoqda.
So‘nggi ma’lumotlarga ko‘ra, mutaxassislar qamoqxonada 207 ta kasallanish holatini qayd etgan. Koronavirus tashxisi tasdiqlangan barcha shaxslar izolyatsiyaga olingan va ularni davolash ishlari boshlab yuborilgan.
“Sinxua”ning yozishicha, qamoqxonaning ayrim xodimlarida fevral oyi boshidayoq yo‘tal paydo bo‘lgan. 13-fevral kuni qamoqxona xavfsizlik xizmati xodimlaridan biriga koronavirus tashxisi qo‘yilgan. Mahalliy ma’muriyat va qamoqxona rahbariyati kasallik tarqalishining oldini olish choralarini ko‘rgan, biroq epidemiyani to‘xtatib qola olmagan.
Hodisa munosabati bilan partiyaning bir qator amaldorlari va qamoqxona rahbariyati ishdan olingan. Shuningdek, maxsus shifoxona tashkil etish, zarur anjomlarni ajratish, mutaxassislarni safarbar qilish va kasallikni davolash bo‘yicha maxsus guruh tashkil etish, shuningdek, qamoqxonada ishlayotgan va saqlanayotganlarning barini ko‘rikdan o‘tkazish haqida ko‘rsatma berilgan.
The Beijing News’ning yozishicha, Chjeszyan provinsiyasidagi yana bir qamoqxonada 28 ta kasallanish holati aniqlangan.
Xitoydagi koronavirus epidemiyasi 2019-yil dekabrida boshlangan edi. Kasallik Xubey provinsiyasidagi Uxan shahridan boshqa hududlarga tarqalgan. So‘nggi ma’lumotlarga ko‘ra, 2247 kishi koronavirus qurboni bo‘lgan, yana 75 mingdan ortiq kishi kasallangan.
Izoh (0)