O‘zbekistondagi 16 ta respublika ixtisoslashtirilgan ilmiy-amaliy tibbiyot markaziga yo‘naltirilayotgan imtiyozli toifadagi bemorlarga beriladigan orderlarni olishga navbatlar 2019-yilga nisbatan biroz kamaygan. Buning sababi ushbu markazlar mutaxassislari yil davomida hududlarda qat’iy grafik asosida yuqori texnologiyalar yordamida tibbiy tekshiruv va operatsiyalar o‘tkazgan. Viloyatlarga ham zarur zamonaviy texnologiyalar olib kirilmoqda. Bu haqda 21-fevral, juma kuni, Oliy Majlis Qonunchilik palatasi Fuqarolarning sog‘lig‘ini saqlash masalalari qo‘mitasi yig‘ilishida ta’kidlab o‘tildi.
“Daryo” muxbiri Mirolim Isajonovning xabar berishicha, davolash-profilaktika muassasalarida imtiyoz guruhlariga kiruvchi aholiga davolanish uchun order berish hukumatning 2004 va 2017-yillarda imzolangan qarorlari bilan tartibga solinadi.
Tahliliy-tanqidiy ruhda o‘tgan yig‘ilishda order berish bilan bog‘liq muammolar va katta navbatlarning qanday omillar bois yuzaga kelayotgani to‘g‘risida ham so‘z yuritildi.
“Order berishdagi muammolarning eng asosiysi — 16 ta markazga Vazirlar Mahkamasining 826-sonli qarorida belgilangan kvota miqdorida yetarli mablag‘ ajratilmayapti. Shu sabab markazlarga budjet hisobidan davolanadigan imtiyozli toifaga kiruvchi bemorlarni yo‘llashda cheklovlar kuzatilyapti. Natijada, navbatlar ham hosil bo‘lmoqda.
Misol uchun, 2019-yilda xirurgiya markaziga tibbiy xizmatlar uchun 30 foiz, shoshilinch xizmat uchun esa 5 foiz miqdorda mablag‘ ajratish belgilangan edi. Ammo yil mobaynida 18 foizga moliyalashtirildi. Bu mablag‘ 1 ming 400 ta orderga yetgan. Fuqarolarda esa 2 ming 880 ta statsionar orderga ehtiyoj tug‘ilgan.
Shuningdek, kardiologiya markaziga o‘tgan yili tibbiy xizmatlarga 30 foiz, shoshilinch xizmat uchun 5 foiz miqdorda davlat budjetidan pul ajratilishi rejalashtirilgan. Biroq amalda 15 foiz moliyalashtirilgan. Ushbu mablag‘ 1 ming 439 ta orderga ishlatilgan. Aholining talabi esa 2 ming 448 ta bo‘lgan.
Qisqasi, 2019-yilda markazlarning birortasiga hukumat qaroridagi kvotalar miqdorida davlat budjetidan to‘liq mablag‘ ajratilmagan. O‘rtacha moliyalashtirish 8—18 foizni tashkil qilgan.
Bundan tashqari, respublika bo‘ylab uyushtirilgan sayyor qabullar va markazlarning viloyatlarga yordam sifatida o‘tkazilgan tibbiy tekshiruvlarida imtiyoz guruhiga kiruvchi kasalliklarning aniqlanishi natijasida orderga bo‘lgan ehtiyoj ham bir necha barobarga oshgan”, — dedi Sog‘liqni saqlash vazirligi Davolash-profilaktika yordamini tashkillashtirish bosh boshqarmasi boshlig‘i o‘rinbosari Bahrom Mo‘minov.
SSV rasmiysining qo‘shimcha qilishicha, muammolar bo‘lishiga qaramay, order olishga navbatlar o‘tgan yilga nisbatan biroz kamaygan.
“2019-yil boshida 16 ming 381 nafar odam navbatda turgan bo‘lsa, bu ko‘rsatkich joriy yil boshida 12 ming 323 tani tashkil etdi. Buning sababi markazlar yil davomida hududlarda qat’iy grafik asosida yuqori texnologiyalar asosida 2 ming 569 ta operatsiya o‘tkazdi. Mahalliy mutaxassislarga uslubiy amaliy maslahatlar ko‘rsatilyapti. Shuningdek, viloyatlarga ham zarur zamonaviy texnologiyalar olib kirilmoqda.
Joriy yil yakuniga qadar viloyatlarda markazlarning 15 ta filialini ochish rejalashtirilgan. 2021—2022-yillarda esa 14 ta filial faoliyati yo‘lga qo‘yiladi. Shu tariqa navbatga ehtiyoj yana kamayadi”, — dedi Bahrom Mo‘minov.
Izoh (0)