Ўзбекистондаги 16 та республика ихтисослаштирилган илмий-амалий тиббиёт марказига йўналтирилаётган имтиёзли тоифадаги беморларга бериладиган ордерларни олишга навбатлар 2019 йилга нисбатан бироз камайган. Бунинг сабаби ушбу марказлар мутахассислари йил давомида ҳудудларда қатъий график асосида юқори технологиялар ёрдамида тиббий текширув ва операциялар ўтказган. Вилоятларга ҳам зарур замонавий технологиялар олиб кирилмоқда. Бу ҳақда 21 февраль, жума куни, Олий Мажлис Қонунчилик палатаси Фуқароларнинг соғлиғини сақлаш масалалари қўмитаси йиғилишида таъкидлаб ўтилди.
«Дарё» мухбири Миролим Исажоновнинг хабар беришича, даволаш-профилактика муассасаларида имтиёз гуруҳларига кирувчи аҳолига даволаниш учун ордер бериш ҳукуматнинг 2004 ва 2017 йилларда имзоланган қарорлари билан тартибга солинади.
Таҳлилий-танқидий руҳда ўтган йиғилишда ордер бериш билан боғлиқ муаммолар ва катта навбатларнинг қандай омиллар боис юзага келаётгани тўғрисида ҳам сўз юритилди.
«Ордер беришдаги муаммоларнинг энг асосийси — 16 та марказга Вазирлар Маҳкамасининг 826-сонли қарорида белгиланган квота миқдорида етарли маблағ ажратилмаяпти. Шу сабаб марказларга бюджет ҳисобидан даволанадиган имтиёзли тоифага кирувчи беморларни йўллашда чекловлар кузатиляпти. Натижада, навбатлар ҳам ҳосил бўлмоқда.
Мисол учун, 2019 йилда хирургия марказига тиббий хизматлар учун 30 фоиз, шошилинч хизмат учун эса 5 фоиз миқдорда маблағ ажратиш белгиланган эди. Аммо йил мобайнида 18 фоизга молиялаштирилди. Бу маблағ 1 минг 400 та ордерга етган. Фуқароларда эса 2 минг 880 та стационар ордерга эҳтиёж туғилган.
Шунингдек, кардиология марказига ўтган йили тиббий хизматларга 30 фоиз, шошилинч хизмат учун 5 фоиз миқдорда давлат бюджетидан пул ажратилиши режалаштирилган. Бироқ амалда 15 фоиз молиялаштирилган. Ушбу маблағ 1 минг 439 та ордерга ишлатилган. Аҳолининг талаби эса 2 минг 448 та бўлган.
Қисқаси, 2019 йилда марказларнинг бирортасига ҳукумат қароридаги квоталар миқдорида давлат бюджетидан тўлиқ маблағ ажратилмаган. Ўртача молиялаштириш 8—18 фоизни ташкил қилган.
Бундан ташқари, республика бўйлаб уюштирилган сайёр қабуллар ва марказларнинг вилоятларга ёрдам сифатида ўтказилган тиббий текширувларида имтиёз гуруҳига кирувчи касалликларнинг аниқланиши натижасида ордерга бўлган эҳтиёж ҳам бир неча баробарга ошган», — деди Соғлиқни сақлаш вазирлиги Даволаш-профилактика ёрдамини ташкиллаштириш бош бошқармаси бошлиғи ўринбосари Баҳром Мўминов.
ССВ расмийсининг қўшимча қилишича, муаммолар бўлишига қарамай, ордер олишга навбатлар ўтган йилга нисбатан бироз камайган.
«2019 йил бошида 16 минг 381 нафар одам навбатда турган бўлса, бу кўрсаткич жорий йил бошида 12 минг 323 тани ташкил этди. Бунинг сабаби марказлар йил давомида ҳудудларда қатъий график асосида юқори технологиялар асосида 2 минг 569 та операция ўтказди. Маҳаллий мутахассисларга услубий амалий маслаҳатлар кўрсатиляпти. Шунингдек, вилоятларга ҳам зарур замонавий технологиялар олиб кирилмоқда.
Жорий йил якунига қадар вилоятларда марказларнинг 15 та филиалини очиш режалаштирилган. 2021—2022 йилларда эса 14 та филиал фаолияти йўлга қўйилади. Шу тариқа навбатга эҳтиёж яна камаяди», — деди Баҳром Мўминов.
Изоҳ (0)