Namangan viloyat sog‘liqni saqlash boshqarmasi tashabbusi bilan hamkor tashkilotlar ishtirokida Namangan xalqaro aeroportida koronavirus kirib kelish xavfini bartaraf etish bo‘yicha maxsus-taktik o‘quv mashqi o‘tkazildi. Bu haqda “Daryo” muxbiri Azizbek Abduvaliyev xabar bermoqda.
O‘quv mashqiga viloyat va Namangan shahar hokimliklari, Sog‘liqni saqlash, Favqulodda vaziyatlar, Ichki ishlar, Bojxona boshqarmalari, aviatsiya xavfsizligi tezkor guruhi, harbiy qismlar, sanitariya-epidemiologiya nazorati osoyishtaligi markazi, Namangan xalqaro aeroporti tuzilmalari shaxsiy tarkibi jalb etildi.
Mashg‘ulot dasturi doirasida Namanganga samolyotda uchib kelgan yo‘lovchilar orasida koronavirusga chalinganlar borligi haqida shartli ravishda xabar tarqaldi. Barcha xizmatlar oyoqqa turdi. Dastlab havo kemasi dezinfeksiya qilindi. Maxsus tayyorgarlikdan o‘tgan shifokorlar bemor yo‘lovchilarni ajratib oldi. Ular orasida homilador ayol, jarrohlik amaliyotiga ehtiyoj sezayotgan va yuqumli kasallikni boshidan kechirayotgan kishilar bor edi.
Ular himoya libosidagi tibbiyot xodimlari kuzatuvida aeroportdagi belgilangan xonaga olib kirildi. Epidemiolog, infeksionist va boshqa mutaxassislar bemorlardagi kasallik alomatlarini tekshirib ko‘rib, ularni tezda shifoxonaga yotqizish haqida tavsiya berdi. Koronavirusda gumon qilingan bemorlar zudlik bilan maxsus sanitar avtomashinalarga olib chiqildi va shifoxonaga jo‘natildi.
Tez tibbiy yordam avtomashinalari viloyat yuqumli kasalliklar shifoxonasi tomon yo‘l oldi. Bu yerda zamonaviy tibbiy asbob-anjomlar, zurur dori-darmonlar bilan ta’minlangan gospital, izolyator va observator xonalari tayyorlab qo‘yilgan.
Shartli bemorlarga shoshilinch tibbiy xizmat ko‘rsatildi va ularni davolash ishlari boshlab yuborildi.
Jumladan, koronavirusga uchragan bemorga viloyat yuqumli kasalliklar shifoxonasi shifokorlari, qornida og‘riq sezgan bemorga RShTYoIM Namangan filiali jarrohlari, homilador ayolga esa viloyat perinatal markazi akusher-ginekologlari tibbiy yordam ko‘rsatdi.
Kasallikka chalinganlikda gumon qilinganlar virus tarqatishining oldi olindi, xavf bartaraf etildi.
— Mashqda qiyin bo‘lsa, amaliyotda oson kechadi. Bugungi maxsus-taktik o‘quv mashqida koronavirus epidemiyasi tarqalgan taqdirda nafaqat tibbiyot xodimlari, balki barcha tizimlarning qanday harakatlanishi zarurligini yana bir karra amalda sinab ko‘rdik. Faoliyatni yanada takomillashtirish zarurligiga amin bo‘ldik, — deydi viloyat sog‘liqni saqlash boshqarmasi boshlig‘i Solijon Mo‘minov.
Izoh (0)