Soyadan soyaga. Hech qachon dunyoning eng yaxshi futbolchisi bo‘la olmaydigan Neymar haqida

Neymarning 2020-yilgi tavallud kuni (5-fevral) shovqinlarsiz, tinch holda o‘tishi kerak edi. Shunday ham bo‘ldi. Braziliyalik eng yaqin do‘stlari va PSJdagi jamoadoshlarini tug‘ilgan kuniga taklif qildi. Hammasi o‘zi xohlagandek o‘tdi. Bu orqali hujumchi ancha katta bo‘lib qolganini, ko‘ngilxushliklarni emas, balki go‘yoki faoliyati borasida qayg‘urishga o‘tganini ko‘rsatdi. 2019-yildagi kabi uning tavallud kuniga mashhur kompaniya homiylik qilib, uni tashkillashtirmadi, hammasi imi-jimida o‘tdi.

Agar eslasangiz, Neymar “Barselona”da Messi va Suares bilan birga dahshatli hujum triosini tashkil etgandi. 2017-yil yozda esa unga orzularini amalga oshirishi uchun Parij shahri mos kelishi oydinlashdi. Nega deysizmi? Neymarga yaqin kishilarning so‘zlariga ko‘ra, futbolchi Messining soyasidan chiqishni va yangi jamoada hal qiluvchi rolga ega bo‘lishni xohlagan. Jamoada ikkinchi bo‘lish — Neymar uchun emasdi.

Yana katta rejalar ichida “Oltin to‘p”ga ega chiqish, dunyoning eng yaxshi futbolchisi sifatida millionlarni ishlash ham bor edi. Bu Neymar uchun amalga oshirsa bo‘ladigan ish edi. Axir u o‘sh vaqtda Ronaldu va Messi bilan bir qatorda tilga olinib kelinayotgandi. Lekin so‘nggi “katta sakrash” amalga oshmadi. Va hatto u PSJning ham eng yaxshi futbolchisi bo‘la olgani yo‘q.

Parijdagi birinchi yili Neymar “Oltin to‘p” uchun kurashda 3-o‘rinda qayd etildi. Oradan bir yil o‘tib 12-o‘rindan joy oldi — 2018-yilgi mundialda Braziliya terma jamoasi bilan omadsizlikka uchradi. O‘tgan yili esa Yevropaning eng yaxshi 30 nafar futbolchisi ro‘yxatidan PSJning ikki futbolchisi o‘rin oldi. Neymar esa ro‘yxatda yo‘q edi. Mbappe 6-o‘rinda qayd etilgan bo‘lsa, Neymarning vatandoshi Markinyosga 28-pog‘ona nasib etdi. Neymar hatto nomzod sifatida taqdim ham etilmadi. Kamiga FIFAning The Best sovrini uchun nomzodlar qatoridan ham o‘rin olmadi.

Neymarning nuqtayi nazaridan olib qaralsa, bu uning uchun katta omadsizlik. Ronaldu va Messining vorisi sifatida qaralgan Neymar endi Mbappe boshchilik qilayotgan futbolchilar avlodidan keyingi kadr ortida turibdi.

Neymarning yangi jamoa safiga o‘tishi eng to‘g‘ri qaror bo‘lmagani shundan ko‘rinib turibdi. Avvaliga Parijda hamma yulduz futbolchining harakatlaridan hayratga tushdi, u haqda hech kimning yomon so‘z aytishga tili bormasdi. Neymar esa bu orada o‘z ustida ishlash o‘rniga, o‘zining ijtimoiy statusi haqida qayg‘urishni boshladi. Ko‘ngilxushlik qilib, o‘zining boyliklarini ijtimoiy tarmoqda ko‘z-ko‘z qilish bilan band bo‘ldi.

Neymargacha ko‘plab yulduzlar ham futboldan tashqari hayotda faollik ko‘rsatgan, biroq ular buni futbolchilik faoliyati bilan birga uyg‘un ravishda amalga oshira olgan. Neymarning muammosi esa tug‘ilgan kunidan bir necha kun o‘tib, “Monpelye”ga qarshi bahs davomida oydinlashdi.

Birinchi bo‘limning o‘rtalarida Neymar raqib futbolchisi Arno Sukeni aldashga harakat qilib ko‘rdi. Neymar fint ishlatib, Sukeni dog‘da qoldirishga harakat qildi, biroq to‘p Arnoga tegib, maydon tashqarisiga yo‘l oldi. Uchrashuv hakami Jerom Brisar esa Neymarni raqibning ustidan kulishga harakat qilmoqda deb hisoblab, uni tartibga chaqirgan holda tanbeh berdi. Bundan esa Neymarning jahli chiqib, g‘azab otiga mindi va hakam sha’niga bir qancha so‘zlarni yog‘dirdi. Brisar esa o‘ylab o‘tirmay Neymarni sariq kartochka bilan jazoladi. Tanaffusdan so‘ng ham Neymar olovga yog‘ quyishda davom etib, o‘z uslubida o‘ynadi. O‘zini tinglashga tayyorlarning barchasiga shikoyat qilishdan charchamadi. Verrattiga esa quyidagi so‘zlarni aytdi: “Men futbol o‘ynayapman”.

Neymarning “Monpelye”ga qarshi bahsdagi harakati

Ushbu vaziyat Neymar haqida nimalarni bilish lozimligini yanada aniqlashtiradi. Neymarning topqirligi, texnikasi, o‘z kuchiga ishonishidan uning uchun futboldagi asosiy narsa individual mahorat ekanligini tushunish mumkin. Har holda braziliyalik yulduz uchun shunday. Iste’dod uni dunyoning eng taniqli futbolchilaridan biriga aylantirdi. Ammo o‘sha iste’dodning o‘zi Neymarning yangi darajaga chiqishiga to‘siq bo‘ldi. Xalaqit berdi. Uning kuchli tomonlari — eng katta kamchiligi hamdir.

Ijtimoiy tarmoqlar Neymarning qoyilmaqom fintlarni amalga oshirayotgan giflar-u videolarga to‘la. Har bir yangi fint Neymarning asosiy kadrga chiqishi va ko‘plab tomoshabinlarni mahliyo bo‘lishi uchun yetarli bo‘ladi. Biroq ushbu videolar kontekstdan yulib olingan, xolos. Unda faqat kuch namoyishi aks etgan. Mazmunsiz futbolni esa umuman futbol deb bo‘lmaydi.

Neymarning ajoyib harakatlari, fintlari o‘yin uchun qo‘shimcha bonus, ammo u baribir futbolning asosi emas. Uning uchun barqarorlik emas, balki birgina yorqin harakat bilan barcha kameralarni o‘ziniki qilish muhimroq. Neymar har doim eng yaxshi bo‘lishni xohlagan, lekin u qanday sifatlar bilan bunga erishish mumkinligini hali ham tushunmagan.

Albatta, unda hali vaqt bor. U hali ham qoyilmaqom futbolchi va hozir ko‘proq faqat futbol haqida o‘ylashga harakat qilmoqda. PSJda “Borussiya”ni yengish uchun hali imkoniyat bor. Neymar esa hali o‘z so‘zini aytishi mumkin.

Ammo hozirgacha ko‘rganlarimizning barchasi — bu Neymarning chegarasi deb o‘ylashga majbur qiladi. Dahoning paydo bo‘lishi, soniyali buyuklik, qoyilmaqom harakat va barchasi tamom. O‘ziga xos, ammo... Tug‘ilgan kun bayramlari esa baribir ham “kamtarlik” Neymarning tushunchasidan tashqaridagi notabiiy narsa ekanligini ko‘rsatadi.