Соядан сояга. Ҳеч қачон дунёнинг энг яхши футболчиси бўла олмайдиган Неймар ҳақида

Неймарнинг 2020 йилги таваллуд куни (5 февраль) шовқинларсиз, тинч ҳолда ўтиши керак эди. Шундай ҳам бўлди. Бразилиялик энг яқин дўстлари ва ПСЖдаги жамоадошларини туғилган кунига таклиф қилди. Ҳаммаси ўзи хоҳлагандек ўтди. Бу орқали ҳужумчи анча катта бўлиб қолганини, кўнгилхушликларни эмас, балки гўёки фаолияти борасида қайғуришга ўтганини кўрсатди. 2019 йилдаги каби унинг таваллуд кунига машҳур компания ҳомийлик қилиб, уни ташкиллаштирмади, ҳаммаси ими-жимида ўтди.

Агар эсласангиз, Неймар «Барселона»да Месси ва Суарес билан бирга даҳшатли ҳужум триосини ташкил этганди. 2017 йил ёзда эса унга орзуларини амалга ошириши учун Париж шаҳри мос келиши ойдинлашди. Нега дейсизми? Неймарга яқин кишиларнинг сўзларига кўра, футболчи Мессининг соясидан чиқишни ва янги жамоада ҳал қилувчи ролга эга бўлишни хоҳлаган. Жамоада иккинчи бўлиш — Неймар учун эмасди.

Яна катта режалар ичида «Олтин тўп»га эга чиқиш, дунёнинг энг яхши футболчиси сифатида миллионларни ишлаш ҳам бор эди. Бу Неймар учун амалга оширса бўладиган иш эди. Ахир у ўш вақтда Роналду ва Месси билан бир қаторда тилга олиниб келинаётганди. Лекин сўнгги «катта сакраш» амалга ошмади. Ва ҳатто у ПСЖнинг ҳам энг яхши футболчиси бўла олгани йўқ.

Неймарнинг нуқтаи назаридан олиб қаралса, бу унинг учун катта омадсизлик. Роналду ва Мессининг вориси сифатида қаралган Неймар энди Мбаппе бошчилик қилаётган футболчилар авлодидан кейинги кадр ортида турибди.

Неймарнинг янги жамоа сафига ўтиши энг тўғри қарор бўлмагани шундан кўриниб турибди. Аввалига Парижда ҳамма юлдуз футболчининг ҳаракатларидан ҳайратга тушди, у ҳақда ҳеч кимнинг ёмон сўз айтишга тили бормасди. Неймар эса бу орада ўз устида ишлаш ўрнига, ўзининг ижтимоий статуси ҳақида қайғуришни бошлади. Кўнгилхушлик қилиб, ўзининг бойликларини ижтимоий тармоқда кўз-кўз қилиш билан банд бўлди.

Неймаргача кўплаб юлдузлар ҳам футболдан ташқари ҳаётда фаоллик кўрсатган, бироқ улар буни футболчилик фаолияти билан бирга уйғун равишда амалга ошира олган. Неймарнинг муаммоси эса туғилган кунидан бир неча кун ўтиб, «Монпелье»га қарши баҳс давомида ойдинлашди.

Биринчи бўлимнинг ўрталарида Неймар рақиб футболчиси Арно Сукени алдашга ҳаракат қилиб кўрди. Неймар финт ишлатиб, Сукени доғда қолдиришга ҳаракат қилди, бироқ тўп Арнога тегиб, майдон ташқарисига йўл олди. Учрашув ҳаками Жером Брисар эса Неймарни рақибнинг устидан кулишга ҳаракат қилмоқда деб ҳисоблаб, уни тартибга чақирган ҳолда танбеҳ берди. Бундан эса Неймарнинг жаҳли чиқиб, ғазаб отига минди ва ҳакам шаънига бир қанча сўзларни ёғдирди. Брисар эса ўйлаб ўтирмай Неймарни сариқ карточка билан жазолади. Танаффусдан сўнг ҳам Неймар оловга ёғ қуйишда давом этиб, ўз услубида ўйнади. Ўзини тинглашга тайёрларнинг барчасига шикоят қилишдан чарчамади. Верраттига эса қуйидаги сўзларни айтди: «Мен футбол ўйнаяпман».

Неймарнинг «Монпелье»га қарши баҳсдаги ҳаракати

Ушбу вазият Неймар ҳақида нималарни билиш лозимлигини янада аниқлаштиради. Неймарнинг топқирлиги, техникаси, ўз кучига ишонишидан унинг учун футболдаги асосий нарса индивидуал маҳорат эканлигини тушуниш мумкин. Ҳар ҳолда бразилиялик юлдуз учун шундай. Истеъдод уни дунёнинг энг таниқли футболчиларидан бирига айлантирди. Аммо ўша истеъдоднинг ўзи Неймарнинг янги даражага чиқишига тўсиқ бўлди. Халақит берди. Унинг кучли томонлари — энг катта камчилиги ҳамдир.

Ижтимоий тармоқлар Неймарнинг қойилмақом финтларни амалга ошираётган гифлар-у видеоларга тўла. Ҳар бир янги финт Неймарнинг асосий кадрга чиқиши ва кўплаб томошабинларни маҳлиё бўлиши учун етарли бўлади. Бироқ ушбу видеолар контекстдан юлиб олинган, холос. Унда фақат куч намойиши акс этган. Мазмунсиз футболни эса умуман футбол деб бўлмайди.

Неймарнинг ажойиб ҳаракатлари, финтлари ўйин учун қўшимча бонус, аммо у барибир футболнинг асоси эмас. Унинг учун барқарорлик эмас, балки биргина ёрқин ҳаракат билан барча камераларни ўзиники қилиш муҳимроқ. Неймар ҳар доим энг яхши бўлишни хоҳлаган, лекин у қандай сифатлар билан бунга эришиш мумкинлигини ҳали ҳам тушунмаган.

Албатта, унда ҳали вақт бор. У ҳали ҳам қойилмақом футболчи ва ҳозир кўпроқ фақат футбол ҳақида ўйлашга ҳаракат қилмоқда. ПСЖда «Боруссия»ни енгиш учун ҳали имконият бор. Неймар эса ҳали ўз сўзини айтиши мумкин.

Аммо ҳозиргача кўрганларимизнинг барчаси — бу Неймарнинг чегараси деб ўйлашга мажбур қилади. Даҳонинг пайдо бўлиши, сонияли буюклик, қойилмақом ҳаракат ва барчаси тамом. Ўзига хос, аммо... Туғилган кун байрамлари эса барибир ҳам «камтарлик» Неймарнинг тушунчасидан ташқаридаги нотабиий нарса эканлигини кўрсатади.