Rossiya Federatsiyasi Qrim respublikasi Kerch shahrida yashovchi 2003 va 2004-yillarda tug‘ilgan ikki nafar o‘smir ikkita ta’lim muassasasida terakt sodir etishni rejalashtirganlikda ayblanib hibsga olindi. Bu haqda Meduza xabar qildi.
Qo‘lga tushganlarning biri Federal xavfsizlik xizmati vakillari bilan suhbatda maktabni portlatmoqchi bo‘lganini tan olgan. Ikkinchi terakt rejalashtirilgan joyning qayer ekanligi noma’lumligicha qolmoqda.
Gumonlanuvchilarning uyidan qo‘lbola portlash moslamalari va ularni yasashga kerak bo‘ladigan xomashyo topilgan.
Rossiya FXX ikki nafar o‘smirning 2018-yilda Kerchdagi kollejda 20 nafar odamni o‘ldirgan 18 yoshli Vladislav Roslyakovning izdoshlari va u yaratgan vayronkor g‘oya tarafdorlari ekanini qayd etgan.
Surishtiruv vaqtida ushbu ikki o‘smirning ijtimoiy tarmoqlar va messenjerlarda “o‘lim guruhlari” tashkillashtirish, u yerda boshqa tengdoshlarini og‘ir jinoyatlar sodir etishga chorlash harakatlarini ham amalga oshirganligi ma’lum bo‘lgan.
Izoh (0)