Xitoyning uchta aviakompaniyasi koronavirus sababli 2020-yil 20-yanvardan 13-fevralgacha 78 ming reysni bekor qildi va 13 millionta chiptani qaytarib oldi. “RBK”ning yozishicha, bu haqda Xitoy Davlat mulkini nazorat qilish va boshqarish qo‘mitasi rahbarining o‘rinbosari Jen Xunbin o‘zining Twitter’dagi sahifasida ma’lum qildi.
Uning so‘zlariga ko‘ra, aviakompaniyalar reyslarning bekor qilinishi tufayli jiddiy zarar ko‘rdi, chunki oy taqvimi bo‘yicha yangi yilni nishonlash munosabati bilan bu vaqtga faol sayohatlar davri to‘g‘ri keladi. Xususan, 2020-yilda yangi yil kunlari yo‘lovchilar soni o‘tgan yilning shu davriga nisbatan ikki baravar kamaygan.
Aviakompaniyalardan tashqari turizm sohasida faoliyat yuritadigan kompaniyalar ham zarar ko‘rgan. Jen Xunbinning ta’kidlashicha, diqqatga sazovor joylar, do‘konlar va mehmonxonalar yopilgan.
Avvalroq Xitoyda tarqalgan yangi turdagi koronavirus tufayli mamlakat hududidagi zavodlar va do‘konlar epidemiya oqibatida yopib qo‘yilgani, bu butun dunyoda 5 milliondan ortiq kompaniyalar faoliyatiga salbiy ta’sir ko‘rsatgani xabar berilgan edi. Fitch xalqaro reyting agentligi koronavirusning tarqalishi Xitoyda avtomobil sotish hajmining pasayishiga va butun dunyo bo‘ylab avtomobillar yetkazib berish jarayonining buzilishiga olib kelishi mumkinligidan ogohlantirgan.
Hozirda Xitoydagi asosiy sanoat tarmoqlari bo‘yicha korxonalar koronavirus tarqalishi sharoitida ishlab chiqarishni davom ettirishni boshladi, biroq hali ham ularning ishini qiyinlashtiruvchi muammolar mavjud. Virus tufayli Xitoyning 300 ta kompaniyasi 8,2 milliard AQSh dollari miqdorida qarz olishni rejalashtirmoqda.
Xitoy Milliy sog‘liqni saqlash komissiyasi ma’lumotlariga ko‘ra, Xitoyda koronavirus bilan kasallanganlar soni 72 ming kishidan oshib ketdi, virus oqibatida vafot etganlar soni esa 1868 kishiga yetdi.
Izoh (0)