Samarqandda bosqinchilik qilib, o‘zganing mulkini egallamoqchi bo‘lgan jinoyatchilarga sud hukmi o‘qildi

Samarqandda bosqinchilik jinoyatini sodir etgan fuqarolarga nisbatan sud hukmi o‘qildi. Bu haqda “Daryo” muxbiri xabar berdi.

2019-yilning 22-aprel kuni soat tonggi 04:20 atrofida 1991-yilda tug‘ilgan Sarvinoz Nig‘matova D.V. bilan birga Samarqand shahar Ro‘dakiy ko‘chasidagi xonadonda uxlab yotgan vaqtida 1982-yilda tug‘ilgan Jonibek Saidmurodov va 1983-yilda tug‘ilgan Firuz Murodov ushbu xonadonga kirib, D.V.ga go‘yoki, Sarvinoz Nig‘matova ularning qarindoshi ekanligini, unga uylanmasdan aldab yurganligi uchun jazolashlarini aytgan. So‘ng ular D.V.ni do‘pposlab, qo‘l-oyoqlarini bog‘lab, kiyimlarni yechib, yalang‘och holatga keltirib rasmga tushirib, uni internet tarmog‘i orqali tarqatib yuborishini aytib qo‘rqitgan.

Jonibek Saidmurodov va Firuz Murodov jabrlanuvchi D.V.dan ijtimoiy tarmoqlarda surati tarqab ketmasligi uchun 7 ming dollar pul berishini talab qilgan.

Shuningdek, Sarvinoz Nig‘matova o‘zining jinoiy harakatlarini davom ettirib, Jonibek Saidmurodov va Firuz Murodov jabrlanuvchi D.V.ga nisbatan tovlamachilik harakatlarini amalga oshirayotgan vaqtida qulay fursatdan foydalangan. Sarvinoz Nig‘matova ushbu jinoyatni o‘zi tashkil qilganligini bildirmaslik maqsadida D.V.ga tegishli bo‘lgan Nexia rusumli avtomashinada turgan 6 200 000 so‘m pul va 500 dollarlik telefon apparatini talon-toroj qilgan. Bu ham yetmaganidek, D.V.ning fuqarolik pasporti va boshqa hujjatlarini g‘arazli niyatda egallab olgan.

Tergov davomida ma’lum bo‘lishicha, Sarvinoz Nig‘matova o‘zganing mulkini tovlamachilik yo‘li bilan qo‘lga kiritish maqsadida tanishlari Jonibek Saidmurodov va Firuz Murodov bilan oldindan til biriktirib, o‘zining jinoiy rejasiga ko‘ra, u bilan o‘zaro ishqiy munosabatda bo‘lib kelgan tanishi D.V.ning moddiy sharoiti yaxshi ekanligini bilgani holda, unga zo‘rlik ishlatish va u sir saqlanishi lozim bo‘lgan ma’lumotlarni oshkor qilish yo‘li bilan qo‘rqitib, moddiy qimmatliklarini egallashni maqsad qilgan.

Jinoyat ishlari bo‘yicha Samarqand shahar sudida bo‘lib o‘tgan sud majlisida sudlanuvchi Firuz Murodovning ta’kidlashicha, Sarvinoz Nig‘matovaning chaqiruvi asosida Jonibek Saidmurodov bilan uyga kirib, yalang‘och holatda uxlab yotgan D.V.ni bir-ikki musht bilan urgan. Unga Sarvinoz Nig‘matovaning ammasining o‘g‘illari ekanligini aytib, uylanmasdan aldab yurganligi sababli uni jazolashini bildirib, turli joylariga tepgan.

Voqea sodir bo‘lgan kuni tanishi Jonibek Saidmurodov bilan xonadondan chiqib, yashash uyiga ketgan. 2019-yilning 23-aprel kuni Jonibek Saidmurodov unga orqalaridan odam tushganligini bildirib, O‘zbekiston hududidan chiqib ketish kerakligini aytgan. Shundan so‘ng, u Jonibek Saidmurodov bilan birga Toshkent shahriga kelgan. Kechgacha Toshkent shahrida bo‘lib, Qozog‘istonga o‘tib ketmoqchi bo‘lib, chegaradan o‘tayotganida O‘zbekiston chegarachilari ularni ushlab, IIB xodimlariga topshirgan.

Sud majlisida sudlanuvchi tariqasida so‘roq qilingan Jonibek Saidmurodovning ma’lum qilishicha, mazkur ishni bajarish uchun tanishi Firuz Murodov ikkalasi Sarvinoz Nig‘matovadan dastlab 1200 dollar talab qilgan. Sarvinoz Nig‘matovaga bu summa qimmatlik qilishini aytganidan so‘ng 600 dollar berishga kelishgan.

Jinoyat ishlari bo‘yicha Samarqand shahar sudi sudyasi F.Samatovning “Daryo”ga ma’lum qilishicha, sudlanuvchilar Firuz Murodov va Jonibek Saidmurodov O‘zbekiston Respublikasi Jinoyat Kodeksining 165-moddasi (tovlamachilik) 2-qismi “v” bandi bilan aybli deb topilib, ularga nisbatan 5 yil muddatga ozodlikdan mahrum qilish jazosi tayinlangan.

Sudlanuvchi Sarvinoz Nig‘matovaga esa O‘zbekiston Respublikasi Jinoyat Kodeksining 165-moddasi (tovlamachilik) 2-qismi “v” bandi bilan JKning 57-moddasi qo‘llanilib, 3 yil muddatga ozodlikdan mahrum qilish jazosi tayinlandi. Shuningdek, JKning 169-moddasi (o‘g‘rilik) 1-qismi bilan har oylik ish haqining 10 foizini davlat daromadiga ushlab qolgan holda 1 yil muddatga axloq tuzatish ishlari jazosi tayinlandi.