Самарқандда босқинчилик қилиб, ўзганинг мулкини эгалламоқчи бўлган жиноятчиларга суд ҳукми ўқилди

Самарқандда босқинчилик жиноятини содир этган фуқароларга нисбатан суд ҳукми ўқилди. Бу ҳақда «Дарё» мухбири хабар берди.

2019 йилнинг 22 апрель куни соат тонгги 04:20 атрофида 1991 йилда туғилган Сарвиноз Ниғматова Д.В. билан бирга Самарқанд шаҳар Рўдакий кўчасидаги хонадонда ухлаб ётган вақтида 1982 йилда туғилган Жонибек Саидмуродов ва 1983 йилда туғилган Фируз Муродов ушбу хонадонга кириб, Д.В.га гўёки, Сарвиноз Ниғматова уларнинг қариндоши эканлигини, унга уйланмасдан алдаб юрганлиги учун жазолашларини айтган. Сўнг улар Д.В.ни дўппослаб, қўл-оёқларини боғлаб, кийимларни ечиб, яланғоч ҳолатга келтириб расмга тушириб, уни интернет тармоғи орқали тарқатиб юборишини айтиб қўрқитган.

Жонибек Саидмуродов ва Фируз Муродов жабрланувчи Д.В.дан ижтимоий тармоқларда сурати тарқаб кетмаслиги учун 7 минг доллар пул беришини талаб қилган.

Шунингдек, Сарвиноз Ниғматова ўзининг жиноий ҳаракатларини давом эттириб, Жонибек Саидмуродов ва Фируз Муродов жабрланувчи Д.В.га нисбатан товламачилик ҳаракатларини амалга ошираётган вақтида қулай фурсатдан фойдаланган. Сарвиноз Ниғматова ушбу жиноятни ўзи ташкил қилганлигини билдирмаслик мақсадида Д.В.га тегишли бўлган Nexia русумли автомашинада турган 6 200 000 сўм пул ва 500 долларлик телефон аппаратини талон-торож қилган. Бу ҳам етмаганидек, Д.В.нинг фуқаролик паспорти ва бошқа ҳужжатларини ғаразли ниятда эгаллаб олган.

Тергов давомида маълум бўлишича, Сарвиноз Ниғматова ўзганинг мулкини товламачилик йўли билан қўлга киритиш мақсадида танишлари Жонибек Саидмуродов ва Фируз Муродов билан олдиндан тил бириктириб, ўзининг жиноий режасига кўра, у билан ўзаро ишқий муносабатда бўлиб келган таниши Д.В.нинг моддий шароити яхши эканлигини билгани ҳолда, унга зўрлик ишлатиш ва у сир сақланиши лозим бўлган маълумотларни ошкор қилиш йўли билан қўрқитиб, моддий қимматликларини эгаллашни мақсад қилган.

Жиноят ишлари бўйича Самарқанд шаҳар судида бўлиб ўтган суд мажлисида судланувчи Фируз Муродовнинг таъкидлашича, Сарвиноз Ниғматованинг чақируви асосида Жонибек Саидмуродов билан уйга кириб, яланғоч ҳолатда ухлаб ётган Д.В.ни бир-икки мушт билан урган. Унга Сарвиноз Ниғматованинг аммасининг ўғиллари эканлигини айтиб, уйланмасдан алдаб юрганлиги сабабли уни жазолашини билдириб, турли жойларига тепган.

Воқеа содир бўлган куни таниши Жонибек Саидмуродов билан хонадондан чиқиб, яшаш уйига кетган. 2019 йилнинг 23 апрель куни Жонибек Саидмуродов унга орқаларидан одам тушганлигини билдириб, Ўзбекистон ҳудудидан чиқиб кетиш кераклигини айтган. Шундан сўнг, у Жонибек Саидмуродов билан бирга Тошкент шаҳрига келган. Кечгача Тошкент шаҳрида бўлиб, Қозоғистонга ўтиб кетмоқчи бўлиб, чегарадан ўтаётганида Ўзбекистон чегарачилари уларни ушлаб, ИИБ ходимларига топширган.

Суд мажлисида судланувчи тариқасида сўроқ қилинган Жонибек Саидмуродовнинг маълум қилишича, мазкур ишни бажариш учун таниши Фируз Муродов иккаласи Сарвиноз Ниғматовадан дастлаб 1200 доллар талаб қилган. Сарвиноз Ниғматовага бу сумма қимматлик қилишини айтганидан сўнг 600 доллар беришга келишган.

Жиноят ишлари бўйича Самарқанд шаҳар суди судьяси Ф.Саматовнинг «Дарё»га маълум қилишича, судланувчилар Фируз Муродов ва Жонибек Саидмуродов Ўзбекистон Республикаси Жиноят Кодексининг 165-моддаси (товламачилик) 2-қисми «в» банди билан айбли деб топилиб, уларга нисбатан 5 йил муддатга озодликдан маҳрум қилиш жазоси тайинланган.

Судланувчи Сарвиноз Ниғматовага эса Ўзбекистон Республикаси Жиноят Кодексининг 165-моддаси (товламачилик) 2-қисми «в» банди билан ЖКнинг 57-моддаси қўлланилиб, 3 йил муддатга озодликдан маҳрум қилиш жазоси тайинланди. Шунингдек, ЖКнинг 169-моддаси (ўғрилик) 1-қисми билан ҳар ойлик иш ҳақининг 10 фоизини давлат даромадига ушлаб қолган ҳолда 1 йил муддатга ахлоқ тузатиш ишлари жазоси тайинланди.