Qo‘shma Shtatlar “Uch dengiz tashabbusi”ga kiruvchi Yevropa mamlakatlarida energetika sohasini rivojlantirish uchun 1 milliard dollar ajratadi. Bu haqda Amerika tashqi siyosat idorasi rahbari Maykl Pompeo Myunxenda o‘tgan xavfsizlik konferensiyasi vaqtida ma’lum qilgan, deb yozmoqda AFP.
“Maqsadimiz — ushbu mamlakatlarda xususiy sektorga investitsiyalarni jalb qilish orqali energetikani rivojlantirish”, — deya ta’kidlagan Pompeo.
AQSh davlat kotibi Vashington ushbu yo‘l orqali Yevropa mamlakatlarining Rossiya gaziga qaramligini kamaytirishni maqsad qilganligini qayd etdi.
Pompeoning aytishicha, Yevropa energetika loyihalari uchun mablag‘lar hukumat tarkibiga kiruvchi va prezident Donald Tramp administratsiyasi tomonidan tashkil etilgan Amerika xalqaro taraqqiyotni moliyalashtirish korporatsiyasi tomonidan ajratiladi.
Mavzuga doir:
- AQShning Germaniyadagi elchisi: “Shimoliy oqim—2” gaz quvuriga qarshi sanksiyalar Yevropa manfaatlarini ko‘zlab qabul qilingan
- AQSh Senati qo‘mitasi Rossiyaga qarshi “do‘zaxdan sanksiyalar” nomini olgan yangi sanksiyalarni ma’qulladi
- AQSh Senati Rossiya gaz quvurlariga qarshi sanksiyalar ko‘zda tutilgan mudofaa budjetini tasdiqladi
AQSh siyosatchilari Yevropa davlatlarining Rossiya energiya manbalariga qaramligini kamaytirish haqida avval ham bir necha marta gapirgan. Qo‘shma Shtatlar Rossiyadan Yevropaga o‘tadigan “Shimoliy oqim — 2” gaz quvurining qurilishiga qarshi chiqmoqda. AQSh ushbu loyihada ishtirok etayotgan kompaniyalarga nisbatan sanksiyalar qo‘llagan. Yevropa Ittifoqi Amerika sanksiyalarini tanqid qilgan va bu taqiqlar Yevropada qonuniy biznes qilayotgan kompaniyalarga qaratilganiga norozilik bildirgan. Rossiya hukumati o‘z navbatida “Shimoliy oqim — 2” quvuri sanksiyalarga qaramay qurib bitkazilishini bildirgan.
Izoh (0)