Қўшма Штатлар «Уч денгиз ташаббуси»га кирувчи Европа мамлакатларида энергетика соҳасини ривожлантириш учун 1 миллиард доллар ажратади. Бу ҳақда Америка ташқи сиёсат идораси раҳбари Майкл Помпео Мюнхенда ўтган хавфсизлик конференцияси вақтида маълум қилган, деб ёзмоқда AFP.
«Мақсадимиз — ушбу мамлакатларда хусусий секторга инвестицияларни жалб қилиш орқали энергетикани ривожлантириш», — дея таъкидлаган Помпео.
АҚШ давлат котиби Вашингтон ушбу йўл орқали Европа мамлакатларининг Россия газига қарамлигини камайтиришни мақсад қилганлигини қайд этди.
Помпеонинг айтишича, Европа энергетика лойиҳалари учун маблағлар ҳукумат таркибига кирувчи ва президент Дональд Трамп администрацияси томонидан ташкил этилган Америка халқаро тараққиётни молиялаштириш корпорацияси томонидан ажратилади.
Мавзуга доир:
- АҚШнинг Германиядаги элчиси: «Шимолий оқим—2» газ қувурига қарши санкциялар Европа манфаатларини кўзлаб қабул қилинган
- АҚШ Сенати қўмитаси Россияга қарши «дўзахдан санкциялар» номини олган янги санкцияларни маъқуллади
- АҚШ Сенати Россия газ қувурларига қарши санкциялар кўзда тутилган мудофаа бюджетини тасдиқлади
АҚШ сиёсатчилари Европа давлатларининг Россия энергия манбаларига қарамлигини камайтириш ҳақида аввал ҳам бир неча марта гапирган. Қўшма Штатлар Россиядан Европага ўтадиган «Шимолий оқим — 2» газ қувурининг қурилишига қарши чиқмоқда. АҚШ ушбу лойиҳада иштирок этаётган компанияларга нисбатан санкциялар қўллаган. Европа Иттифоқи Америка санкцияларини танқид қилган ва бу тақиқлар Европада қонуний бизнес қилаётган компанияларга қаратилганига норозилик билдирган. Россия ҳукумати ўз навбатида «Шимолий оқим — 2» қувури санкцияларга қарамай қуриб битказилишини билдирган.
Изоҳ (0)