2019-yilda Amerika uy xo‘jaliklarining kreditlar bo‘yicha umumiy qarzdorligi 601 milliard dollar yoki 1,4 foizga ortib, rekord 14,15 trillion dollarni tashkil etdi, deb yozadi “RBK” Nyu-York federal zaxira banki ma’lumotlariga asoslanib.
Bu moliyaviy inqiroz hukm surgan 2008-yilning uchinchi choragidagi ko‘rsatkichdan 1,5 trillion dollarga ko‘proq. Qarzlar ketma-ket 22-chorak mobaynida o‘sib bormoqda.
Umumiy summaning aksariyat qismi ya’ni 9,56 trillion dollar ipoteka bo‘yicha, bir yil ichida ular 433 milliard dollarga ortdi. Undan keyin esa o‘qish uchun olingan qarzlar — 1,51 trillion dollarni tashkil etmoqda. Ushbu summaning 100 milliard dollari 60 yoshdan kattaroq odamlarga berilgan.
Avtokreditlar va kredit kartalari bo‘yicha qarzdorlik 57 milliard dollarga oshib, mos ravishda 1,33 trillion va 0,93 trillion dollarni tashkil etdi.
Qayd etilishicha, 18 yoshdan 29 yoshgacha bo‘lgan fuqarolarning qarzlari umumiy miqdori rekord 1,04 trillion dollarga yetdi.
Kredit kartalari bo‘yicha qarzlar 2016-yildan beri o‘sib bormoqda. Ayniqsa, yoshlar o‘rtasida, deyiladi xabarda.
Nyu-York federal zaxira banki iqtisodchilari 20—30 yoshli fuqarolarning qarzlari miqdori oshib borishini o‘qish uchun xarajatlar katta ekanligi bilan izohlaydi.
Izoh (0)