Yuzlab kompaniyalar, xususan Xiaomi va DiDi banklardan jami 8,2 mlrd AQSh dollari miqdorida qarz so‘ramoqda. Kompaniyalarning ayrimlari epidemiyaga qarshi kurashga jalb etilgan, muayyan qismi koronavirus tarqalishi oqibatida jiddiy ziyon ko‘rgan.
Yuzlab Xitoy kompaniyalari koronavirus oqibatlarini bartaraf qilish maqsadida banklarga jami 8,2 mlrd AQSh dollari miqdorida kredit berishni so‘rab murojaat qilgan, deb yozmoqda “RBK”.
Reuters manbalari bergan xabarga ko‘ra, kompaniyalar orasida smartfonlar ishlab chiqaruvchi Xiaomi va Xitoyda oziq-ovqat yetkazib beruvchi eng katta Meituan Dianping kompaniyasi , transport xizmatlarini ko‘rsatuvchi DiDi, texnologik Megvii, shuningdek, antivirus dasturlar va mobil ilovalar ishlab chiqaruvchi Qihoo 360 bor.
Ushbu kompaniyalar koronavirusga qarshi kurashga faol tarzda jalb etilgan yoki kasallik tufayli jiddiy zarar ko‘rgan bo‘lishi mumkin. Manbalarga ko‘ra, kredit so‘rab murojaat qilgan tashkilotlar qisqa vaqt ichida banklardan ijobiy javob olishi kutilmoqda. Bundan tashqari kreditlar imtiyozli stavkalar asosida beriladi.
“Kredit borasidagi so‘nggi so‘z banklar tomonidan aytiladi. Stavkalar foizi banklar o‘z yetakchi mijozlariga taklif qiladigan miqdor bilan bir xil bo‘ladi”, — degan Reuters manbasi.
Hozircha kompaniyalar epidemiyani yengil o‘tish uchun oladigan kreditlar hajmi qancha bo‘lishi haqida ma’lumotlar yo‘q. Shunga qaramay, ular banklardan so‘rayotgan pullarning qancha ekani manbalar bergan ro‘yxatlarda aks etgan.
Masalan, Xiaomi tibbiyot uskunalari va aksessuarlari, jumladan niqoblar hamda termometrlar ishlab chiqarish uchun 5 mlrd yuan (716 mln dollardan ko‘proq) kredit so‘ramoqda. Meituan Dianping 4 mlrd yuan (572,9 mln dollar) mablag‘ olmoqchi. Ushbu pullarning bir qismi Uxandagi tibbiyot xodimlariga ovqat yetkazib berishga sarflanadi.
DiDi koronavirusdan jiddiy zarar ko‘rgan va 50 mln yuan (7,16 mln dollar), Qihoo tibbiyotga mo‘ljallangan mahsulotlar, virusni lokalizatsiya qilish va kuzatish imkonini beradigan mobil ilovalalar ishlab chiqish uchun 360 milliondan 1 milliard yuangacha (taxminan 143,25 mln dollar) kredit olmoqchi. Megvii ham kasallikka qarshi kurash texnologiyalarini ishlab chiqadi, ulardan biri “olomon ichida tibbiy niqob taqqan odamlarni aniqlash” imkonini beradi.
Koronavirusga qarshi birinchi vaksina bir yarim yildan keyin ishlab chiqilishi mumkin, deya ta’kidlagan Jahon sog‘liqni saqlash tashkiloti rahbari Tedros Gebreyesus. Uning nutqi matni tashkilot rasmiy saytiga joylashtirilgan.Gebreyesus vaksina va dorilar ishlab chiqilishi yangi virusni tadqiq qilish dasturining bir qismi bo‘ladi.
“Ularni ishlab chiqish muayyan vaqt talab qiladi, lekin bu biz himoyasiz ekanimizni anglatmaydi”, — degan JSST rahbari.
Uning so‘zlariga ko‘ra, bugun koronavirus tarqalishining oldini olish bo‘yicha ko‘plab chora-tadbirlar amalga oshirilgan.
JSST koronavirusga COVID-19 deb rasmiy nom bergan, kasallikka chalingan bemorlar soni 11-fevral holatiga ko‘ra, Xitoyda 42 708 nafarga yetgan, qolgan 24 mamlakatda virusga chalinish bo‘yicha 393 ta holat qayd etilgan. Virus tufayli 1018 nafar odam hayotdan ko‘z yumgan.
Izoh (0)