“Budjetchi talabalar”ga hukumat tomonidan qaytariladigan besh oylik stipendiya miqdori ma’lum bo‘ldi

Hozirda O‘zbekistonda 99 ta oliy ta’lim muassasasi mavjud bo‘lib, talabalarning 88 ming 455 nafari davlat granti, 278 ming 885 nafari esa to‘lov kontrakt asosida tahsil olmoqda. Qariyb 196 ming nafar yoki 72 foiz talaba o‘z xohishiga ko‘ra, stipendiyasiz kontrakt asosida o‘qishni ma’qul ko‘rgan.

Bu haqda 7-fevral kuni Vazirlar Mahkamasining 31-yanvarda qabul qilingan “Oliy ta’lim muassasalari talabalariga to‘lanadigan stipendiyalar miqdorlarini belgilash hamda stipendiyalar tayinlash va to‘lash tartibini takomillashtirish chora-tadbirlari to‘g‘risida”gi qarori yuzasidan o‘tkazilgan matbuot anjumanida ma’lum qilindi.

“Daryo” muxbiri Mirolim Isajonovning xabar berishicha, Moliya vazirligi va OTM rektorlari ishtirokidagi tadbirda yangi tartibga oid barcha muhim savollarga mutasaddilar tomonidan javob qaytarildi.

“Vazirlar Mahkamasining mazkur qaroriga muvofiq, davlat granti asosida tahsil olib, o‘tgan semestrni “4” va “5” bahoga yopib, 400 ming so‘m va 460 ming so‘m stipendiya olgan talabalarga davlat budjeti hisobidan besh oylik, ya’ni sentabr—yanvar oylaridagi qolgan stipendiya puli qaytarib beriladi.

Savol tug‘ilishi mumkin: ularga har oy uchun qancha miqdorda mablag‘ qaytariladi? Ma’lumki, avvalgi stipendiya tayinlash tartibi bo‘yicha budjetda o‘qiyotgan “beshchi”lar har oyda 752 ming so‘m stipendiya olardi. Ularga tajriba-sinov tariqasida yo‘lga qo‘yilgan tartib bilan esa 2019-yil sentabr—yanvar oylarida 460 ming so‘mdan to‘landi. Hisob bo‘yicha davlat ularga yana har bir oy uchun 292 ming 300 so‘mdan stipendiya berishi kerak. Demak, davlat granti asosida “5” bahoga o‘qiyotganlar o‘tgan besh oy uchun jami 1 million 461 ming 600 so‘m qo‘shimcha stipendiya oladi.

Oldingi tartibda “4” bahoga o‘qigan budjetdagi yigit-qizlarga oyiga 564 ming 200 so‘mdan stipendiya berilardi. Ularga o‘tgan besh oy ichida 400 ming so‘mdan stipendiya to‘landi. Endilikda biz ularga har bir oyga 164 ming 200 so‘mdan jami 821 ming 200 so‘m qolgan stipendiyani qaytaramiz.

Budjetdagi “uch” baholi stipendiya oluvchi talabalarga avvallari 376 ming 200 so‘mdan stipendiya tayinlanardi. Sentabr—yanvar oylarida ularga ham 400 ming so‘mdan stipendiya berildi. Hisob-kitob qilinsa, “3” baholi stipendiya oluvchilar har bir oy uchun 23 ming 800 so‘m, besh oyga jami 119 so‘m qarz bo‘lib chiqadi. Ammo ular buni davlatga qaytarmaydi, o‘zida qoladi.

Stipendiyalardagi ushbu tafovut uzog‘i bilan 15-fevralgacha to‘lab beriladi”, — dedi Oliy va o‘rta-maxsus ta’lim vaziri o‘rinbosari Sarvarxon Buzrukxonov.