Ҳозирда Ўзбекистонда 99 та олий таълим муассасаси мавжуд бўлиб, талабаларнинг 88 минг 455 нафари давлат гранти, 278 минг 885 нафари эса тўлов контракт асосида таҳсил олмоқда. Қарийб 196 минг нафар ёки 72 фоиз талаба ўз хоҳишига кўра стипендиясиз контракт асосида ўқишни маъқул кўрган.
Бу ҳақда 7 февраль куни Вазирлар Маҳкамасининг 31 январда қабул қилинган «Олий таълим муассасалари талабаларига тўланадиган стипендиялар миқдорларини белгилаш ҳамда стипендиялар тайинлаш ва тўлаш тартибини такомиллаштириш чора-тадбирлари тўғрисида»ги қарори юзасидан ўтказилган матбуот анжуманида маълум қилинди.
«Дарё» мухбири Миролим Исажоновнинг хабар беришича, Молия вазирлиги ва ОТМ ректорлари иштирокидаги тадбирда янги тартибга оид барча муҳим саволларга мутасаддилар томонидан жавоб қайтарилди.
«Вазирлар Маҳкамасининг мазкур қарорига мувофиқ, давлат гранти асосида таҳсил олиб, ўтган семестрни «4» ва «5» баҳога ёпиб, 400 минг сўм ва 460 минг сўм стипендия олган талабаларга давлат бюджети ҳисобидан беш ойлик, яъни сентябрь—январь ойларидаги қолган стипендия пули қайтариб берилади.
Мавзуга доир: Беш ой давомида «аъло» ва «яхши» ўқиган талабаларнинг стипендиясидаги тафовут давлат бюджети ҳисобидан қопланадиган бўлди
Олдинги тартибда «4» баҳога ўқиган бюджетдаги йигит-қизларга ойига 564 минг 200 сўмдан стипендия бериларди. Уларга ўтган беш ой ичида 400 минг сўмдан стипендия тўланди. Эндиликда биз уларга ҳар бир ойга 164 минг 200 сўмдан жами 821 минг 200 сўм қолган стипендияни қайтарамиз.
Мавзуга доир: «Контрактдаги талаба»лар ўзлаштириш кўрсаткичидан қатъи назар базавий стипендияни олади
Стипендиялардаги ушбу тафовут узоғи билан 15 февралгача тўлаб берилади», — деди Олий ва ўрта-махсус таълим вазири ўринбосари Сарвархон Бузрукхонов.
Изоҳ (0)