Markaziy Osiyodagi aholisi eng ko‘p mamlakat hisoblangan O‘zbekistonning 34 million fuqarosidan 19 million kishi mehnatga layoqatli bo‘lib, band aholi qariyb 15 million kishini tashkil etadi. Har yili 600 mingdan ziyod yoshlar mehnat bozoriga kirib kelmoqda. Bu haqda 5-fevral, chorshanba kuni, Toshkentda o‘tkazilgan “Islohotlarni qo‘llab-quvvatlash yo‘lida munosib mehnatni ta’minlash” mavzuyidagi xalqaro davra suhbatida ma’lum qilindi.
“Daryo” muxbiri Mirolim Isajonovning xabar berishicha, tadbirda Oliy Majlis Senati a’zolari va Qonunchilik palatasi deputatlari, Xalqaro mehnat tashkilotining O‘zbekistondagi vakillari, Xalqaro migratsiya tashkiloti, BMT Taraqqiyot dasturi, Jahon banki, Osiyo taraqqiyot banki, UNICEF, UNESCO, diplomatik korpus vakillari, Cotton Campaign xalqaro koalitsiyasi a’zolari qatnashdi.
Davra suhbati davomida Oliy Majlis Senati raisi Tanzila Norboyeva OAV vakillariga majburiy mehnat, Xalqaro mehnat tashkilotining ratifikatsiya qilinishi rejalashtirilgan konvensiyalari haqida intervyu berdi.
“Garchand Xalqaro mehnat tashkilotiga mustaqilligimizning birinchi yillaridanoq a’zo bo‘lsak-da, lekin 2013-yildan boshlab bizning hamkorligimiz yangicha bir tus oldi. O‘sha yildan XMT va O‘zbekiston o‘rtasida Mamlakat mehnat dasturi imzolandi. Dasturning asosiy komponentlari ham ish o‘rinlarini yaratish va ularning munosib bo‘lishini ta’minlashga yo‘naltirilgan.
Eng avvalo, odamlarimizga yetarli darajada oylik maosh to‘lash, ularning ijtimoiy himoyasini ta’minlash va mehnatini muhofaza qilish zarur. Bu masalalarni amalga oshirish birgina Bandlik va mehnat munosabatlari vazirligining ishi emas. Balki barcha vazirlik, idora, tashkilotlar, ayniqsa, jamoat tashkilotlari va dunyo bo‘yicha nufuzli bo‘lgan XMTning ham ishtiroki talab qilinadi. Shuning uchun bizning ular bilan imzolagan juda keng miqyosli Mamlakat dasturimiz mavjud”, — dedi Tanzila Norboyeva.
Senat raisining ta’kidlashicha, jahon hamjamiyati vakillari xalqaro hujjatlarni ratifikatsiya qilish, belgilangan talablarni og‘ishmay bajarish bo‘yicha O‘zbekistonni mintaqa doirasida “chempion” deb hisoblagan.
“XMT — BMTning mehnat masalalari bo‘yicha bir agenti. Uning 200 ga yaqin konvensiyasi bor. O‘zbekiston shulardan 17 tasini ratifikatsiya qilgan. Nima uchun kam, degan savol paydo bo‘lishi mumkin. Oldin 13 ta konvensiya ratifikatsiya qilingan edi xolos. Oxirgi 3 yil ichida esa XMTning muhim konvensiyalarini ratifikatsiya qildik. Eng asosiysi, majburiy mehnat, bolalar mehnati to‘g‘risidagi konvensiyalarga ham qo‘shildik.
Bu yilgi monitoring o‘tkazish natijalari juda ham ijobiy baholandi. Oldingi yillari qishloq xo‘jaligi sohasida budjet tashkilotlari vakillari, talabalar va boshqa soha xodimlarini majburlab mehnatga jalb qilish, ularga haq to‘lamaslik, mehnat sharoitlarining mutlaqo talabga javob bermasligi holatlari kuzatilardi. So‘nggi ikki yil davomida avvaliga bolalar mehnatini, so‘ngra majburiy mehnat holatlarini ham bartaraf qildik. Buni jahon hamjamiyati alohida e’tirof etmoqda.
To‘g‘ri, ayrim holatlarda majburiy yoki bolalar mehnati kuzatilyapti. Buni jurnalistlarimiz ham juda yaxshi biladi. Chunki joylarga borganda, ba’zi fuqarolarimiz bilan gaplashasizlar. Ayrim holatlar bo‘lishi mumkin. Ammo ular hech qanday davlat siyosati emas, davlat rahbari, hukumat tomonidan bunday topshiriqlar hech qachon berilmaydi.
Bilasizlar davlatimiz rahbarining 2019-yilda maxsus farmoni qabul qilindi. Qishloq xo‘jaligini rivojlantirishning 2020—2030-yillarga mo‘ljallangan strategiyasi tasdiqlandi. Strategiyaning bosh maqsadi ham shu soha barcha yo‘nalishidagi ishlarni to‘liq bozor mexanizmlariga o‘tkazishdan iborat”, — dedi Oliy Majlis Senati raisi Tanzila Norboyeva.
Izoh (0)