Марказий Осиёдаги аҳолиси энг кўп мамлакат ҳисобланган Ўзбекистоннинг 34 миллион фуқаросидан 19 миллион киши меҳнатга лаёқатли бўлиб, банд аҳоли қарийб 15 миллион кишини ташкил этади. Ҳар йили 600 мингдан зиёд ёшлар меҳнат бозорига кириб келмоқда. Бу ҳақда 5 февраль, чоршанба куни, Тошкентда ўтказилган «Ислоҳотларни қўллаб-қувватлаш йўлида муносиб меҳнатни таъминлаш» мавзуйидаги халқаро давра суҳбатида маълум қилинди.
«Дарё» мухбири Миролим Исажоновнинг хабар беришича, тадбирда Олий Мажлис Сенати аъзолари ва Қонунчилик палатаси депутатлари, Халқаро меҳнат ташкилотининг Ўзбекистондаги вакиллари, Халқаро миграция ташкилоти, БМТ Тараққиёт дастури, Жаҳон банки, Осиё тараққиёт банки, UNICEF, UNESCO, дипломатик корпус вакиллари, Cotton Campaign халқаро коалицияси аъзолари қатнашди.
Давра суҳбати давомида Олий Мажлис Сенати раиси Танзила Норбоева ОАВ вакилларига мажбурий меҳнат, Халқаро меҳнат ташкилотининг ратификация қилиниши режалаштирилган конвенциялари ҳақида интервью берди.
«Гарчанд Халқаро меҳнат ташкилотига мустақиллигимизнинг биринчи йиллариданоқ аъзо бўлсак-да, лекин 2013 йилдан бошлаб бизнинг ҳамкорлигимиз янгича бир тус олди. Ўша йилдан ХМТ ва Ўзбекистон ўртасида Мамлакат меҳнат дастури имзоланди. Дастурнинг асосий компонентлари ҳам иш ўринларини яратиш ва уларнинг муносиб бўлишини таъминлашга йўналтирилган.
Энг аввало, одамларимизга етарли даражада ойлик маош тўлаш, уларнинг ижтимоий ҳимоясини таъминлаш ва меҳнатини муҳофаза қилиш зарур. Бу масалаларни амалга ошириш биргина Бандлик ва меҳнат муносабатлари вазирлигининг иши эмас. Балки барча вазирлик, идора, ташкилотлар, айниқса, жамоат ташкилотлари ва дунё бўйича нуфузли бўлган ХМТнинг ҳам иштироки талаб қилинади. Шунинг учун бизнинг улар билан имзолаган жуда кенг миқёсли Мамлакат дастуримиз мавжуд», — деди Танзила Норбоева.
Сенат раисининг таъкидлашича, жаҳон ҳамжамияти вакиллари халқаро ҳужжатларни ратификация қилиш, белгиланган талабларни оғишмай бажариш бўйича Ўзбекистонни минтақа доирасида «чемпион» деб ҳисоблаган.
«ХМТ — БМТнинг меҳнат масалалари бўйича бир агенти. Унинг 200 га яқин конвенцияси бор. Ўзбекистон шулардан 17 тасини ратификация қилган. Нима учун кам, деган савол пайдо бўлиши мумкин. Олдин 13 та конвенция ратификация қилинган эди холос. Охирги 3 йил ичида эса ХМТнинг муҳим конвенцияларини ратификация қилдик. Энг асосийси, мажбурий меҳнат, болалар меҳнати тўғрисидаги конвенцияларга ҳам қўшилдик.
Бу йилги мониторинг ўтказиш натижалари жуда ҳам ижобий баҳоланди. Олдинги йиллари қишлоқ хўжалиги соҳасида бюджет ташкилотлари вакиллари, талабалар ва бошқа соҳа ходимларини мажбурлаб меҳнатга жалб қилиш, уларга ҳақ тўламаслик, меҳнат шароитларининг мутлақо талабга жавоб бермаслиги ҳолатлари кузатиларди. Сўнгги икки йил давомида аввалига болалар меҳнатини, сўнгра мажбурий меҳнат ҳолатларини ҳам бартараф қилдик. Буни жаҳон ҳамжамияти алоҳида эътироф этмоқда.
Тўғри, айрим ҳолатларда мажбурий ёки болалар меҳнати кузатиляпти. Буни журналистларимиз ҳам жуда яхши билади. Чунки жойларга борганда, баъзи фуқароларимиз билан гаплашасизлар. Айрим ҳолатлар бўлиши мумкин. Аммо улар ҳеч қандай давлат сиёсати эмас, давлат раҳбари, ҳукумат томонидан бундай топшириқлар ҳеч қачон берилмайди.
Биласизлар давлатимиз раҳбарининг 2019 йилда махсус фармони қабул қилинди. Қишлоқ хўжалигини ривожлантиришнинг 2020—2030 йилларга мўлжалланган стратегияси тасдиқланди. Стратегиянинг бош мақсади ҳам шу соҳа барча йўналишидаги ишларни тўлиқ бозор механизмларига ўтказишдан иборат», — деди Олий Мажлис Сенати раиси Танзила Норбоева.
Изоҳ (0)