Avval xabar berilganidek, Xitoydan uchta charter reys orqali O‘zbekistonga olib kelingan fuqarolar Jahon sog‘liqni saqlash tashkiloti tavsiyasiga ko‘ra, kasallikning yashirin davri — 14 kun davomida tibbiy kuzatuvga olish maqsadida maxsus tayyorlangan muassasalarga joylashtirildi.
Sog‘liqni saqlash vazirligi matbuot xizmatiga ko‘ra, ushbu muassasalarga joylashgan fuqarolar bu yerdagi yaratilgan shart-sharoitlardan mamnun. Misol uchun, “Bo‘ston” sanatoriysiga 4-fevral, seshanba kuni, Pekindan olib kelingan 250 nafar fuqaro joylashtirildi. Mazkur tadbirlarga tegishli tartibda kasbiy tayyorgarlikdan o‘tkazilgan sohaning yetakchi va tajribali mutaxassislari jalb etildi.
— Xitoydagi nufuzli universitetda o‘qiyman. Koronavirus epidemiyasi tufayli boshida judayam xavotirlandim. Shunday qiyin paytda Prezident tashabbusi bilan charter reysi tashkil etildi, — deydi navoiylik Mehriddin Zoirov. — Biz joylashgan muassasada barcha zaruriy sharoitlar yaratilgan, o‘rin-joylar, oziq-ovqatlar, zarur dori-darmonlar, diagnostika, dezinfeksiya, shaxsiy himoya va gigiyena vositalari bilan ta’minlangan. Kelgan fuqarolarning kiyimlarini sifatli yuvish uchun kirxona, tibbiy anjomlarni sterilizatsiyadan o‘tkazish uchun alohida punkt va avtotransport uchun dezinfeksiya maydoni va dezinfeksion vositalar zaxirasi yaratilgan.
Darhaqiqat, tibbiy kuzatuvdagi fuqarolarni termometriyadan o‘tkazish, niqoblarni o‘z vaqtida almashtirish va xonalarni shamollatish hamda namli tozalash ishlarining o‘tkazilishi malakali epidemiologlar tomonidan nazoratga olingan. Yuqumli kasalliklar shifokorlari tomonidan ikki mahal tibbiy ko‘rik o‘tkazilmoqda.
Shuningdek, dezinfektor mutaxassislar tomonidan kuniga ikki mahal yotoqxonalar, vannaxonalar va oshxona zararsizlantirilmoqda. Oshxonada ishlatilgan idish-tovoqlarni zararsizlantirish ishlariga ham alohida e’tibor qaratilmoqda.
Ayni paytda koronavirus infeksiyasining O‘zbekistonga kirib kelishining oldini olish borasida tizimli choralar ko‘rilmoqda.
Jumladan, Xitoy bilan O‘zbekiston o‘rtasidagi aviaqatnovlar vaqtincha to‘xtatilgan. Koronavirus infeksiyasi qayd etilgan davlatlardan kelayotgan yo‘lovchilar 12 ta aeroport, 5 ta temir yo‘l hamda davlat chegaralarini kesib o‘tish joylaridagi 53 ta sanitariya-karantin punktida tibbiy ko‘rikdan o‘tkazilmoqda.
Toshkent davlat stomatologiya instituti ma’muriyati binosida call–markaz tashkil etilib, unda Xitoydan olib kelingan o‘zbekistonliklar o‘z oila a’zolari, yaqinlari bilan 30 ga yaqin videokonferensiya aloqa vositalari yordamida to‘g‘ridan to‘g‘ri muloqot qilishi mumkin.
Izoh (0)