O‘zbekiston Respublikasi Prezidenti Shavkat Mirziyoyev 6-fevral, payshanba kuni, neft-gaz sanoatidagi ishlar natijadorligi, tabiiy gaz va suyuq uglevodorodlar qazib olish hajmini oshirish bo‘yicha 2020-yilgi vazifalar muhokamasiga bag‘ishlangan yig‘ilish o‘tkazgani haqida xabar berilgan edi.
Yig‘ilishda Shavkat Mirziyoyev tomonidan O‘zbekiston Energetika vazirligiga bir qator topshiriqlar berildi. Jumladan, tabiiy gaz qazib olishni 2019-yilgiga nisbatan 4,3 milliard kub metrga ko‘paytirish vazifasi qo‘yildi. Shuningdek, “O‘zbekneftgaz” kompaniyasiga har bir konning holatini tanqidiy tahlil qilib, tabiiy gaz qazib chiqarish hajmini oshirish vazifasi yuklatildi.
Bundan tashqari, sohadagi barcha korxonalarda korrupsiyaga qarshi kurashish bo‘yicha “komplayens nazorat” tizimi joriy etilishi belgilandi. Neft-gaz sohasini isloh qilish bo‘yicha loyiha ofisiga ilg‘or xalqaro konsalting kompaniyalarini jalb qilish hamda korxonalarda rahbar xodimlarning maoshini faoliyat samaradorligini baholash ko‘rsatkichlariga (KPI) bog‘lash kerakligi qayd etildi.
Shuningdek, ushbu yig‘ilishda Sho‘rtan gaz-kimyo majmuasida sintetik suyuq yoqilg‘i (GTL) ishlab chiqarish zavodi qurilishining borishi ko‘rib chiqildi. Soha korxonalarida “raqamli kon”, xo‘jalik boshqaruvi va resurslarning avtomatlashtirilgan hisobini yuritish dasturlarini (ERP) joriy etish bo‘yicha topshiriqlar berildi.
Izoh (0)