Jinoyat ishlari bo‘yicha Namangan shahar sudida qo‘shmachilikni o‘ziga kasb qilib olgan ayollarga nisbatan sud hukmi o‘qildi. Bu haqda “Daryo”ga JIB shahar sudi raisi Baxtiyor Tavakkalov ma’lum qildi.
Ulardan ikki nafari — Muhayyo Nosirova (ism-shariflar shartli) va Sayyora Qodirova mazkur jinoyatlari uchun birinchi marotaba sudlangan bo‘lsa, Marg‘uba Shokirova uchun bu ikkinchisi yoki uchinchisi emas, naq yettinchi marotaba sudlanishi edi. Bu sudlanishlarning dastlabkisi 2009, oxirgisi esa 2018-yilda qayd etilgan.
Ish hujjatlariga ko‘ra, sudlanuvchi M.Shokirova muqaddam bir necha marotaba sudlanganligi, xavfli retsidivist ekanligiga qaramay, fohishaxona saqlash, shuningdek, qo‘shmachilik jinoyatini sodir etgan.
Jumladan, 2019-yilning 6-noyabr kuni soat 20:30 atrofida sheriklari bilan oldindan jinoiy til biriktirib, S.Qodirovaga qarashli Namangan shahri, 5a-kichik tumandagi xonadonda 300 000 so‘m evaziga 4 nafar yigit-qiz jinsiy aloqa qilishi uchun shart-sharoit yaratib bergani aniqlangan.
Olib borilgan tezkor surishtiruv ishlari davomida kimyoviy ishlov berilgan pullar xolislar ishtirokida tekshirib ko‘rish uchun olingan, shuningdek, DVD disk daliliy ashyo sifatida e’tirof etilgan.
Sud majlisida Muhayyo Shokirova unga nisbatan e’lon qilingan ayblovga iqror emasligini bildirgan bo‘lsa-da, uning aybi ishda tekshirilgan holatlar, guvohlarning ko‘rsatmalari, so‘zlashuv stenogrammasi va o‘zining tergovdagi dastlabki ko‘rsatmasi bilan tasdig‘ini topdi.
Marg‘uba Shokirova Jinoyat kodeksining 131-moddasi 4-qismi “b” bandi bilan aybdor deb topilib, unga nisbatan 5 yil ozodlikdan mahrum qilish jazosi tayinlandi. Sheriklari Muhayyo Nosirova va Sayyora Qodirovaga esa tegishli ravishda 4 va 3 yil muddatga ozodlikni cheklash jazosi tayinlandi.
Izoh (0)