AQSh bosh prokurori Uilyam Barr Xitoyning Huawei kompaniyasiga qarshi kuchli raqobatchi yaratish uchun Yevropaning telekommunikatsiya uskunalari ishlab chiqaruvchi kompaniyalari hisoblangan Ericsson va Nokia’ning aksiyalarini sotib olishga chaqirdi. Bu haqda “Kommersant” xabar berdi.
Uilyam Barr 6-fevral, payshanba kuni, bo‘lib o‘tgan konferensiyada ma’lum qilishicha, AQSh va uning ittifoqchilari Xitoyning o‘sib borayotgan ta’siriga qarshi turish uchun ushbu kompaniyalarga sarmoya kiritish imkoniyatlarini faol ko‘rib chiqishi kerak. Uning fikriga ko‘ra, bu to‘g‘ridan to‘g‘ri yoki AQSh va ittifoqdosh mamlakatlarning xususiy kompaniyalar konsorsiumi orqali amalga oshirilishi mumkin.
AQSh rasmiylari o‘z ittifoqchilarini Huawei kompaniyasining telekommunikatsiya uskunalaridan foydalanmaslikka bir necha bor chaqirgan, ammo bu chaqiriqlar katta muvaffaqiyatga erishmagan. O‘tgan haftada Buyuk Britaniya va Yevropa Ittifoqi rasmiylari Huawei uskunalarini ishlatishda ba’zi cheklovlarni joriy etdi, ammo cheklovlar kutilganidan ko‘ra yumshoqroq bo‘ldi. Bir necha kun oldin Vodafone rahbari Nik Rid Huawei uskunalariga juda qattiq talablar qo‘yish, 5G tarmoqlarini Yevropada rivojlantirishni ikki yildan besh yilgacha kechiktirishi mumkinligini aytdi.
Uilyam Barr Huawei uskunalarini biron-bir narsa bilan almashtirish qiyinligini tan olgan. Uning fikriga ko‘ra, shu sababdan, agar ushbu kompaniyalardan biri yoki ikkalasi ham AQShning katta bozor va moliyaviy imkoniyatiga ega bo‘lsa, bu ularni yanada ashaddiy raqobatchilarga aylantiradi hamda ularning o‘z mavqeini ushlab qolish bo‘yicha qo‘rquvini bartaraf etadi.
Qayd etilishicha, Nokia va Ericsson kompaniyalari hali Barrning bayonotiga javob bermagan.
Izoh (0)