АҚШ бош прокурори Уильям Барр Хитойнинг Huawei компаниясига қарши кучли рақобатчи яратиш учун Европанинг телекоммуникация ускуналари ишлаб чиқарувчи компаниялари ҳисобланган Ericsson ва Nokia’нинг акцияларини сотиб олишга чақирди. Бу ҳақда «Коммерсантъ» хабар берди.
Уильям Барр 6 февраль, пайшанба куни, бўлиб ўтган конференцияда маълум қилишича, АҚШ ва унинг иттифоқчилари Хитойнинг ўсиб бораётган таъсирига қарши туриш учун ушбу компанияларга сармоя киритиш имкониятларини фаол кўриб чиқиши керак. Унинг фикрига кўра, бу тўғридан-тўғри ёки АҚШ ва иттифоқдош мамлакатларнинг хусусий компаниялар консорциуми орқали амалга оширилиши мумкин.
АҚШ расмийлари ўз иттифоқчиларини Huawei компаниясининг телекоммуникация ускуналаридан фойдаланмасликка бир неча бор чақирган, аммо бу чақириқлар катта муваффақиятга эришмаган. Ўтган ҳафтада Буюк Британия ва Европа Иттифоқи расмийлари Huawei ускуналарини ишлатишда баъзи чекловларни жорий этди, аммо чекловлар кутилганидан кўра юмшоқроқ бўлди. Бир неча кун олдин Vodafone раҳбари Ник Рид Huawei ускуналарига жуда қаттиқ талаблар қўйиш, 5G тармоқларини Европада ривожлантиришни икки йилдан беш йилгача кечиктириши мумкинлигини айтди.
Уильям Барр Huawei ускуналарини бирон-бир нарса билан алмаштириш қийинлигини тан олган. Унинг фикрига кўра, шу сабабдан, агар ушбу компаниялардан бири ёки иккаласи ҳам АҚШнинг катта бозор ва молиявий имкониятига эга бўлса, бу уларни янада ашаддий рақобатчиларга айлантиради ҳамда уларнинг ўз мавқеини ушлаб қолиш бўйича қўрқувини бартараф этади.
Қайд этилишича, Nokia ва Ericsson компаниялари ҳали Баррнинг баёнотига жавоб бермаган.
Изоҳ (0)