Tomskdagi fojia sababchisi deya gumonlanayotgan “Grinvud” firmasi direktori, Xitoy fuqarosi Sun Anni ehtiyot chorasi sifatida qamoqqa olindi. “Interfaks”ning xabar berishicha, ayni vaqtda xitoylik tadbirkor ayolning advokatlari sudga murojaat qilgan.
Eslatib o‘tamiz, joriy yil 21-yanvar kuni Rossiyaning Tomsk viloyatida 12 nafar o‘zbekistonlik yong‘in oqibatida halok bo‘lgan, 2 nafari tirik qolgani haqida xabar qilingandi. Dastlab yong‘in nosoz elektr qurilmasi sabab yuzaga kelgani taxmin qilingandi. Halok bo‘lganlarning barchasi yong‘in sodir bo‘lgan uyda ro‘yxatda turgan. Uy esa inson yashashi uchun yaroqsiz hisoblangan.
Tomsk viloyati gubernatori Sergey Jvachkin Prichulim posyolkasida sodir bo‘lgan yong‘in oqibatida halok bo‘lgan 12 nafar fuqaroning o‘limida elektroqurilmalar emas, balki mansabdor shaxslar aybdor ekanligini ma’lum qilgandi.
Holat yuzasidan Rossiya Jinoyat kodeksining 109-moddasi (Ehtiyotsizlik oqibatida ikki yoki undan ko‘p shaxslarning o‘limiga sabab bo‘lish) bo‘yicha jinoyat ishi qo‘zg‘atilgan, hodisada firma direktori gumonlanib, qidiruvga berilgan edi. U 25-yanvar kuni Tomsk shahridagi mehmonxonalarning birida ushlangan va 27-yanvardan ehtiyot chorasi sifatida qamoqqa olingan.
26-yanvarda fojiada halok bo‘lgan 10 nafar marhumning jasadi olib kelingan, 30-yanvarda esa fojiada tirik qolgan ikki o‘zbekistonlik hamda ikki marhum jasadi ham olib kelingan.
Izoh (0)