12 нафар ўзбекистонлик ҳалок бўлган Томскдаги ёнғин бўйича жавобгар шахс қамоққа олинди

Томскдаги фожиа сабабчиси дея гумонланаётган «Гринвуд» фирмаси директори, Хитой фуқароси Сунь Аньни эҳтиёт чораси сифатида қамоққа олинди. «Интерфакс»нинг хабар беришича, айни вақтда хитойлик тадбиркор аёлнинг адвокатлари судга мурожаат қилган.

Эслатиб ўтамиз, жорий йил 21 январь куни Россиянинг Томск вилоятида 12 нафар ўзбекистонлик ёнғин оқибатида ҳалок бўлган, 2 нафари тирик қолгани ҳақида хабар қилинганди. Дастлаб ёнғин носоз электр қурилмаси сабаб юзага келгани тахмин қилинганди. Ҳалок бўлганларнинг барчаси ёнғин содир бўлган уйда рўйхатда турган. Уй эса инсон яшаши учун яроқсиз ҳисобланган.

Томск вилояти губернатори Сергей Жвачкин Причулим посёлкасида содир бўлган ёнғин оқибатида ҳалок бўлган 12 нафар фуқаронинг ўлимида электроқурилмалар эмас, балки мансабдор шахслар айбдор эканлигини маълум қилганди.

Ҳолат юзасидан Россия Жиноят кодексининг 109-моддаси (Эҳтиётсизлик оқибатида икки ёки ундан кўп шахсларнинг ўлимига сабаб бўлиш) бўйича жиноят иши қўзғатилган, ҳодисада фирма директори гумонланиб, қидирувга берилган эди. У 25 январь куни Томск шаҳридаги меҳмонхоналарнинг бирида ушланган ва 27 январдан эҳтиёт чораси сифатида қамоққа олинган.

26 январда фожиада ҳалок бўлган 10 нафар марҳумнинг жасади олиб келинган, 30 январда эса фожиада тирик қолган икки ўзбекистонлик ҳамда икки марҳум жасади ҳам олиб келинган.