Buxoroning Jondor tumanidagi hunarmand-ustalar tomonidan innovatsion traktor yaratildi. Bu haqda Innovatsion rivojlanish vazirligi matbuot xizmati xabar bermoqda.
Qayd etilishicha, traktor akademik Oqil Salimov rahbarligidagi Toshkent irrigatsiya va qishloq xo‘jaligini mexanizatsiyalash muhandislari instituti “Traktorlar va avtomobillar” kafedrasi professor-o‘qituvchilari hamda jondorlik Shahob Qoryog‘diyev, Shuhrat Suvonov tomonidan ishlab chiqilgan.
Traktorga osma va g‘ildirakli traktorlarda avval qo‘llanilmagan yangi tipdagi dempfirlovchi yumshoq qurilma o‘rnatilgan, u traktorning ish vaqtida tebranishlarini 7-8 baravarga kamaytirish imkonini beradi.
Dvigatel quvvati 152 ot kuchini tashkil qiladi. Traktor 4 ta biogaz ballonlari bilan jihozlangan. Texnikaning asosiy xususiyatlaridan yana biri shu turdagi traktorlar bilan taqqoslaganda sarflanadigan uglevodorodli yonilg‘ini 2 baravarga tejaydi.
Traktorning barcha g‘ildiraklari yetakchi qilib tayyorlangan, umumiy og‘irligi esa 3,2 tonna. Bu og‘irlik 10 tonnadan ortiq bo‘lgan traktorlar kabi tuproqni zichlanishiga salbiy ta’sir ko‘rsatmaydi.
Ixtirochilar traktorni belgilangan tartibda patentlashga muvaffaq bo‘lgan.
Izoh (0)