AQSh hukumati O‘zbekiston Kapital bozorini rivojlantirish agentligiga sohaning normativ-huquqiy asoslarini isloh qilishda yordam bermoqchi. Ushbu maqsadda AQSh tomonidan agentlikka birinchi bosqichda 1 million AQSh dollari miqdorida texnik ko‘mak ajratilishi rejalashtirilgan. Bu haqda AQSh davlat kotibi Maykl Pompeo joriy yilning 2, 3-fevral kunlari O‘zbekistonga tashrifi chog‘ida aytib o‘tdi.
O‘zbekiston Kapital bozorini rivojlantirish agentligi ma’lum qilishicha, bugungi kunda ushbu soha 100 dan ortiq normativ-huquqiy hujjatlar bilan tartibga solingan bo‘lib, endilikda ularning o‘rniga to‘g‘ridan to‘g‘ri amal qiluvchi “Kapital bozori to‘g‘risida”gi va “Kapital bozori regulyatori to‘g‘risida”gi qonun loyihalari ishlab chiqish rejalashtirilgan.
AQSh tomonidan taqdim etilayotgan texnik ko‘mak asosida agentlik tomonidan ushbu qonun loyihalarini tayyorlashga yuqori malakali mutaxassislarni jalb qilish ham nazarda tutilmoqda.
Shuningdek, O‘zbekiston Kapital bozori agentligi va AQShning Qimmatli qog‘ozlar va birjalar bo‘yicha komissiyasi o‘rtasida agentlik xodimlarining malakasini oshirish to‘g‘risida kelishuvga erishildi.
Mavzuga doir:
Izoh (0)