Samarqand viloyati bojxona boshqarmasi tomonidan 2019-yil davomida 880 milliard so‘mdan ziyod bojxona to‘lovlari undirilib, davlat budjetiga o‘tkazilgan. Bu haqda “Daryo”ga viloyat bojxona boshqarmasi axborot xizmati ma’lum qildi.
Xabar qilinishicha, tovarlar eksporti va importini amalga oshirish jarayonida 52 mingdan ortiq bojxona yuk deklaratsiyalari rasmiylashtirilgan. Viloyatdagi korxonalarga bojxona to‘lovlaridan 2,9 trillion so‘mlik imtiyozlar qo‘llanilgan.
2019-yilda Samarqand viloyatidan 362 million dollar qiymatidagi tovarlar xorijga eksport qilingan. 2018-yilga nisbatan solishtirilganda bu ko‘rsatkich 28 foizga oshgan.
O‘tgan yil davomida boshqarma xodimlari tomonidan 996 ta bojxona qonunchiligi buzilishi holati aniqlangan. Ular bo‘yicha 16,89 milliard so‘mlik tovar moddiy boyliklar ushlab qolingan. 2018-yilga nisbatan solishtirilganda bu ko‘rsatkich 14,61 milliard so‘mga oshgan.
Aniqlangan 32 ta holat bo‘yicha Jinoyat kodeksining turli moddalari bilan jinoyat ishlari qo‘zg‘atilgan. Huquqbuzarliklar profilaktikasi yo‘nalishida jami 1127 ta tadbir tashkil etildi.
Samarqand viloyati bojxona boshqarmasiga qarashli bojxona postlari tomonidan 2019-yilda davlat chegarasi orqali harakatlangan 42 120 ta yengil avtotransport vositasi, 1872 ta yuk avtomashinasi, 280 ta avtobus, 14 693 ta temir yo‘l vagoni va 2957 ta aviatransport bojxona nazorati va rasmiylashtiruvidan o‘tkazilgan.
Izoh (0)