Andijonlik Jasurbek Hamroqulov Andijon shahar 6-son IIB profilaktika inspektori Sardor Abdumannopov tomonidan 2019-yil 11-sentabr kuni IIB binosida kaltaklangani haqida xabar berilgan edi. Keyinroq O‘zbekiston Ichki ishlar vazirligi mazkur holat yuzasidan ma’lumot berib, ushbu holat Andijon viloyatining prokuratura organlari tomonidan atroflicha o‘rganib chiqilib, Jinoyat protsessual kodeksining 388-moddasi tartibida sud muhokamasiga yuborilgani haqida xabar bergan edi.
O‘zbekiston Bosh prokuraturasi tomonidan “Daryo”ga ma’lum qilinishicha, 2019-yil 12-oktabr kuni Andijon shahar prokurori tomonidan fuqaro Hamraqulov Jasurbek Baxtiyarovich hamda boshqalarga nisbatan O‘zbekiston Respublikasi Jinoyat kodeksining 219-moddasi 1-qismi bilan jinoyat ishi qo‘zg‘atilgan.
Bosh prokuratura tomonidan xabar berilishicha, 2019-yil 11-sentabr kuni soat taxminan 22:00 da Andijon shahar IIO FMB 6-sonli IIB bo‘linmasi profilaktika inspektori Sardor Abdumannopov tungi xizmatni olib borayotgan vaqtida unga telefon orqali Andijon shahrida joylashgan “Kamelot” nomli kafeda fuqarolar shovqin-suron qilib, tinchlik bermayotganligi to‘g‘risida kafening yuqori qavatida yashovchi fuqarolardan murojaat kelib tushgan.
Bosh prokuratura xabariga ko‘ra, kelib tushgan murojaat asosida inspektor voqea joyiga yetib borganida, kafe ichida fuqaro Jasurbek Hamroqulov mast holda fuqaro O.Boltaboyeva bilan janjallashib, uning yuziga bir musht urganligi ma’lum bo‘lgan. IIB xodimi ularni tinchlantirish uchun kafe binosidan tashqariga olib chiqqan hamda ushbu yer jamoat joyi ekanligini, fuqarolarning tinchligini buzmasligi kerakligini aytganda, fuqaro Jasur Hamroqulov unga bo‘ysunishni xohlamagan. Jasur Hamroqulov inspektorning qonuniy talablarini bajarishdan bo‘yin tovlab, unga faol qarshilik ko‘rsatgan hamda xodimning egnida bo‘lgan xizmat kiyimidagi pogonini yulib olgan.
Qayd etilishicha, sud-tibbiy ekspertizasining 2019-yil 22-sentabrdagi xulosasiga ko‘ra, Jasur Hamroqulovning burun, bo‘yin, o‘ng qo‘l kaftiga va chap qo‘l yelkasiga tan jarohati yetkazilgan.
2020-yilning 9-yanvar kuni Jasur Hamroqulovga nisbatan mazkur jinoyat ishi yuzasidan Jinoyat kodeksining 219-moddasi 1-qismi, 277-moddasi 2-qismi “g” bandi bilan ayb e’lon qilinib, unga nisbatan munosib xulq-atvorda bo‘lish haqida tilxat ehtiyot chorasi qo‘llanilgan.
Dastlabki tergov davomida hodisa sodir bo‘lgan kuni Andijon shahar IIO FMB 6-sonli IIB bo‘linmasida sodir bo‘lgan holat tasvirga tushirilgan kuzatuv kameralaridagi videoyozuvlar, fuqaro Jasur Hamroqulov bilan Sardor Abdumannopov o‘rtasida bo‘lib o‘tgan suhbat yozib olingan audioyozuvlar, ish bo‘yicha tayinlangan stenogrammaning bayonnomasi yozma dalil deb e’tirof etilgan.
Yuqoridagilarga asosan Andijon shahar prokuraturasi tomonidan ishning inspektor Sardor Abdumannopovga tegishli bo‘lgan qismi tergov muhokamasidan chiqarib tugatilgan.
Mazkur jinoyat ishi 2020-yil 11-yanvar kuni mazmunan ko‘rib chiqish uchun ayblov xulosasi bilan Jinoyat ishlari bo‘yicha Andijon shahar sudiga yuborilgan.
Hozirda jinoyat ishi sud muhokamasida ko‘rib chiqilmoqda.
Izoh (0)