Ижтимоий тармоқларда «Бизда илмлининг қадри борми? Ёки математикадан халқаро олимпиада ғолибига замбаракнинг ўқими?!» сарлавҳали хабар тарқалди. Бухоро вилояти халқ таълими бошқармаси ахборот хизмати мазкур мурожаатга муносабат билдирган.
Муносабатда келтирилишича, Президентнинг 2019 йил 3 майдаги «Иқтидорли ёшларни аниқлаш ва юқори малакали кадрлар тайёрлашнинг узлуксиз тизимини ташкил этиш чора-тадбирлари тўғрисида»ги қарори билан асосий халқаро олимпиадалар рўйхати тасдиқланган. Уларнинг ғолиблари ва ўқитувчилари пул билан мукофотланади.
Жумладан, Бухоро вилоятида ўтказилган Мирзо Улуғбек номидаги математика фан олимпиадаси ғолиб ўқувчилари ва уларнинг ўқитувчилари вилоят ҳокимлиги томонидан 104 000 000 сўм пул ва қимматбаҳо совғалар билан тақдирланган.
Дунёда тижорат олимпиадалари ҳам мавжуд. Уларда ўқувчилар тўлов маблағлари эвазига иштирок этади. SEAMO халқаро олимпиадаси шулардан бири.
Австралияда ўтказилган SEAMO халқаро олимпиадасида математикадан олтин медални қўлга киритган Қоракўл туманидаги математика мактаби ўқувчиси Бекзод Нуриддинов Тошкент халқаро аэропортида оила аъзоларидан ташқари, математика мактаби директори Темур Рўзиев бошчилигида вилоят делегацияси, математика мактабининг собиқ битирувчилари иштирокида кутиб олинган.
Ушбу жараён ижтимоий тармоқлар, Халқ таълими вазирлиги расмий каналлари ҳамда ОАВ орқали кенг ёритилган.
«Айни пайтда бухоролик ғолиб ўқувчи Бекзод Нуриддинов Тошкент шаҳрида. Жорий йилнинг 4 февраль куни Бухоро вилоятига етиб келишини муносиб кутиб олиш режалаштирилган», — дейилади хабарда.
Изоҳ (0)