Majburiy ijro byurosi navbatdagi ijro ishini undiruvchi foydasiga hal etdi. Bu haqda MIB matbuot xizmati “Daryo”ga xabar berdi.
Jinoyat ishlari bo‘yicha Uchtepa tuman sudining 2019-yil 2-oktabr sanasidagi ijro varaqasiga asosan, qarzdor M.O.dan undiruvchilar N.A. foydasiga 235 000 AQSh dollari hamda M.M. foydasiga 20 000 AQSh dollari undirish haqidagi ijro ishi Byuroning Uchtepa tuman bo‘limiga 2019-yilning 1-noyabrda kelib tushgan va shu kunning o‘zida ijro ishi yuritishni qo‘zg‘atish haqida qaror qabul qilingan.
Ijro harakatlari davomida qazdorga tegishli bo‘lgan mol-mulklarni aniqlash maqsadida tegishli tashkilotlarga so‘rovnomalar yuborilgan.
Qarzdorning mulkiy ahvolini o‘rganish maqsadida u yashagan manzilga chiqilganda mazkur xonadon ko‘zdan kechirilgan. Ko‘zdan kechirish davomida qarzdor jazoni ijro etish muassasasida O‘zbekiston Respublikasi jinoyat kodeksining 168-moddasida (firibgarlik) ko‘rsatilgan jinoyatni sodir etganligi uchun jazoni o‘tayotganligi sababli uning oila a’zolariga JKning 168-moddasidagi “yetkazilgan moddiy zararning o‘rni qoplangan taqdirda ozodlikni cheklash va ozodlikdan mahrum qilish tariqasidagi jazo qo‘llanilmaydi” degan qoida tushuntirilgan.
Byuroning Uchtepa tuman bo‘limi tomonidan 2020-yilning 13-yanvar kuni undiruvchi A.N. va M.M.ga qarzdor M.O.ning oila a’zolari tomonidan undiruvchilar A.N.ga 235 000 AQSh dollari (2 244 428 600 so‘m undiruv kunidagi kurs bo‘yicha so‘mdagi qiymati) hamda M.M.ga 20 000 AQSh dollari (191 015 200 so‘m undiruv kunidagi kurs bo‘yicha so‘mdagi qiymati) miqdorida zarar to‘liq qoplangan.
Ijro ishi amalda to‘liq ijro etilganligi sababli mazkur ijro hujjati tamomlangan.
Izoh (0)