Prezident Shavkat Mirziyoyev 31-yanvar kuni Toshkentning Olimlar ko‘chasidagi ilmiy-tadqiqot institutlariga tashrif buyurib, yangi quriladigan Geologiya fanlari universiteti kampusiga tamal toshi qo‘ygani haqida xabar berilgan edi.
Shavkat Mirziyoyev shu yerda ilmiy-tadqiqot institutlari xodimlari, olimlar, yosh tadqiqotchilar bilan ham suhbatlashdi. Prezident 30 yil avval O‘zbekistonda geologiya raqobatbardosh, xorijliklar tajriba o‘rganadigan soha bo‘lgani, ammo o‘tgan davrda bu salohiyat boy berilganini ta’kidladi.
“Bir paytlar O‘zbekistonda geologiya ancha rivojlangan, raqobatbardosh soha edi. Hatto boshqalar kelib, yurtimiz mutaxassislaridan tajriba o‘rganib ketardi. Lekin oxirgi o‘ttiz yilda bu soha e’tibordan chetda qolib ketdi. Bor salohiyatni saqlab qololmadik. Olimlarga yo‘nalish, rag‘bat bo‘lmadi. Zamonaviy kadrlar yetishib chiqmadi”, — dedi davlat rahbari.
Prezidentning ta’kidlashicha, geologik tadqiqotlar iqtisodiyotning hamma sohalari uchun kerak — tashxissiz bemorni operatsiya qilib bo‘lmaganidek, geologiyasiz sanoatni rivojlantirib bo‘lmaydi. “Biz bugun shu soha rivojiga asos bo‘ladigan ilm dargohiga poydevor qo‘ymoqdamiz”, — dedi Shavkat Mirziyoyev soha olimlari, yosh tadqiqotchilar bilan bo‘lib o‘tgan suhbatda.
Izoh (0)