Мажбурий ижро бюроси навбатдаги ижро ишини ундирувчи фойдасига ҳал этди. Бу ҳақда МИБ матбуот хизмати «Дарё»га хабар берди.
Жиноят ишлари бўйича Учтепа туман судининг 2019 йил 2 октябрь санасидаги ижро варақасига асосан, қарздор М.О.дан ундирувчилар Н.А. фойдасига 235 000 АҚШ доллари ҳамда М.М. фойдасига 20 000 АҚШ доллари ундириш ҳақидаги ижро иши Бюронинг Учтепа туман бўлимига 2019 йилнинг 1 ноябрда келиб тушган ва шу куннинг ўзида ижро иши юритишни қўзғатиш ҳақида қарор қабул қилинган.
Ижро ҳаракатлари давомида қаздорга тегишли бўлган мол-мулкларни аниқлаш мақсадида тегишли ташкилотларга сўровномалар юборилган.
Қарздорнинг мулкий аҳволини ўрганиш мақсадида у яшаган манзилга чиқилганда мазкур хонадон кўздан кечирилган. Кўздан кечириш давомида қарздор жазони ижро этиш муассасасида Ўзбекистон Республикаси жиноят кодексининг 168-моддасида (фирибгарлик) кўрсатилган жиноятни содир этганлиги учун жазони ўтаётганлиги сабабли унинг оила аъзоларига ЖКнинг 168-моддасидаги «етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди» деган қоида тушунтирилган.
Бюронинг Учтепа туман бўлими томонидан 2020 йилнинг 13 январь куни ундирувчи А.Н. ва М.М.га қарздор М.О.нинг оила аъзолари томонидан ундирувчилар А.Н.га 235 000 АҚШ доллари (2 244 428 600 сўм ундирув кунидаги курс бўйича сўмдаги қиймати) ҳамда М.М.га 20 000 АҚШ доллари (191 015 200 сўм ундирув кунидаги курс бўйича сўмдаги қиймати) миқдорида зарар тўлиқ қопланган.
Ижро иши амалда тўлиқ ижро этилганлиги сабабли мазкур ижро ҳужжати тамомланган.
Изоҳ (0)