AQSh Davlat departamenti butun dunyo bo‘ylab joylashgan Amerika elchixonalariga “tug‘ish turizmi”ga aloqadorlikda gumonlangan homilador ayollarga viza bermaslik bo‘yicha farmoyish telegrammasini jo‘natdi, deb xabar beradi “Kommersant”.
“Tug‘ish turizmi” — homilador ayollar farzandiga fuqarolik olib berish uchun mamlakatga tashrif buyurishiga aytiladi. Vox yangiliklar saytining ma’lumotlariga ko‘ra, telegrammalar 22-yanvar, chorshanba kuni yuborilgan bo‘lib, 24-yanvardan farmoyishda ko‘zda tutilgan cheklov chora-tadbirlari kuchga kiradi.
Avvalroq mazkur hujjat loyihasi ishlab chiqilayotgani haqida xabar berilgandi. Unda Amerika vizasini olish uchun ariza bergan barcha homilador ayollar mamlakatga kirish uchun muhim biror yumushi borligini asoslab berishlari kerak.
Rejaga ko‘ra, B tipidagi vizalarni (turistik va ish yuzasidan qisqa muddatga beriladigan) berish tartibi qiyinlashtiriladi. Mansabdor shaxslar fuqaro AQShga u yerda farzandini dunyoga keltirish uchun borayotganini bilib qolsa, viza berishni rad etishi mumkin bo‘ladi. Buning tartibi qanday bo‘lishi hozircha noma’lum.
Izoh (0)