АҚШ Давлат департаменти бутун дунё бўйлаб жойлашган Америка элчихоналарига «туғиш туризми»га алоқадорликда гумонланган ҳомиладор аёлларга виза бермаслик бўйича фармойиш телеграммасини жўнатди, деб хабар беради «Коммерсантъ».
«Туғиш туризми» — ҳомиладор аёллар фарзандига фуқаролик олиб бериш учун мамлакатга ташриф буюришига айтилади. Vox янгиликлар сайтининг маълумотларига кўра, телеграммалар 22 январь, чоршанба куни юборилган бўлиб, 24 январдан фармойишда кўзда тутилган чеклов чора-тадбирлари кучга киради.
Аввалроқ мазкур ҳужжат лойиҳаси ишлаб чиқилаётгани ҳақида хабар берилганди. Унда Америка визасини олиш учун ариза берган барча ҳомиладор аёллар мамлакатга кириш учун муҳим бирор юмуши борлигини асослаб беришлари керак.
Режага кўра, B типидаги визаларни (туристик ва иш юзасидан қисқа муддатга бериладиган) бериш тартиби қийинлаштирилади. Мансабдор шахслар фуқаро АҚШга у ерда фарзандини дунёга келтириш учун бораётганини билиб қолса, виза беришни рад этиши мумкин бўлади. Бунинг тартиби қандай бўлиши ҳозирча номаълум.
Изоҳ (0)