Facebook AQSh prezidenti Donald Trampga qayta saylanishiga yordam beradi. Bu haqda 89 yoshli milliarder Jorj Sorosning so‘zlariga asoslanib, Meduza xabar berdi.
“O‘ylashimcha, Tramp va Facebook norasmiy kelishuv ustida ishlamoqda. Facebook Trampning qayta saylanishini ta’minlaydi, Tramp esa Facebook’ni himoya qiladi”, — deydi Soros.
Soros o‘z fikrini asoslash uchun hech qanday dalil keltirmagan. Facebook vakili esa Sorosning so‘zlarini “shunchaki noto‘g‘ri” deb atadi.
Qayd etilishicha, turli mamlakatlar hukumatlari so‘nggi vaqtda Facebook faoliyatini sinchkovlik bilan kuzatmoqda. Bunga esa AQShning fikricha, Donald Trampning saylovda g‘olib bo‘lishi uchun Rossiya tomonidan Facebook’da berilgan yashirin reklama kampaniyasi sabab bo‘lgan.
Facebook’ni 2016-yilda tarmoqda tarqalgan feyk xabarlarni bloklamasdan, buning ortidan prezidentlik saylovlarida Trampning g‘olib bo‘lishiga sharoit yaratib berganlikda ayblashgan edi.
2017-yilda Facebook rossiyalik “trollar fabrikasi” faoliyati tufayli siyosiy reklama bilan ishlash siyosatini o‘zgartirishini ma’lum qilgan edi.
Ijtimoiy tarmoq vakillarining fikricha, reklama kampaniyasi Rossiya hududidan joylashtirilgan. Reklama 470 ta feyk akkauntdan qo‘yilgan. E’lonlarga 100 ming dollar sarflangan.
Twitter, Google va Spotify 2019-yilda o‘z platformalarida siyosiy reklamani cheklab qo‘ydi.
Facebook bunday qilmasdan, foydalanuvchilarga o‘zlari ko‘rayotgan e’lonlar ustidan nazorat o‘rnatish uchun ko‘proq imkon berishini ma’lum qilgandi. Kompaniya yangi funksiyani 2020-yilning birinchi choragida ishga tushirishini ma’lum qilgan edi.
Izoh (0)