O‘zbekiston Konstitutsiyasining 77-moddasida Senatning 16 nafar a’zosi fan, san’at, adabiyot, ishlab chiqarish sohasida hamda davlat va jamiyat faoliyatining boshqa tarmoqlarida katta amaliy tajribaga ega bo‘lgan hamda alohida xizmat ko‘rsatgan eng obro‘li fuqarolar orasidan Prezident tomonidan tayinlanishi belgilangan.
Xalqaro press-klubning xabar berishicha, Shavkat Mirziyoyev tomonidan imzolangan Oliy Majlis Senati a’zolarini tayinlash to‘g‘risidagi farmon bilan 13 nafar senator tayinlangan. E’tiborli tomoni, ulardan ikki nafari hukumat a’zosi, yana ikki nafari esa Prezident administratsiyasi vakili. Tayinlangan 13 nafar senator ro‘yxati quyidagicha:
- Shavkat Ayupov — Fanlar akademiyasi V.I.Romanovskiy nomidagi Matematika instituti direktori;
- Elmira Bositxonova — bosh vazir o‘rinbosari — O‘zbekiston Xotin-qizlar qo‘mitasi raisi;
- Qudratulla Rafiqov — O‘zbekiston kasaba uyushmalari Federatsiyasi Kengashi raisi;
- Mirakbar Rahmonqulov — Prezidenti huzuridagi Strategik va mintaqalararo tadqiqotlar instituti direktorining birinchi o‘rinbosari;
- Sirojiddin Sayyid — O‘zbekiston Yozuvchilar uyushmasi raisi;
- Baxtiyor Sayfullayev — madaniyat vaziri — O‘zbekiston davlat konservatoriyasi rektori;
- Quvondiq Sanaqulov — Navoiy kon-metallurgiya kombinati bosh direktori;
- Sodiq Safoyev — Senat raisining birinchi o‘rinbosari;
- Alisher Sa’dullayev — Prezidentning yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisining birinchi o‘rinbosari;
- Sodiqjon Turdiyev — O‘zbekiston faxriylarining ijtimoiy faoliyatini qo‘llab-quvvatlash “Nuroniy” jamg‘armasi boshqaruvi raisi;
- Minhojiddin Hojimatov — Respublika Ma’naviyat va ma’rifat markazi rahbari;
- Tursinxon Xudoybergenov — Prezidenti maslahatchisi;
- Behzod Yo‘ldoshev — O‘zbekiston Fanlar akademiyasi prezidenti.
Avvalgi tarkibda Senatning Yoshlar, madaniyat va sport masalalari qo‘mitasi raisi bo‘lgan Iqbol Mirzo 2019-yilgi parlament saylovlarida Qonunchilik palatasiga saylandi. 17-yanvar holatiga ko‘ra, Aysenam Alliyarova, Mahamadjon Zufarov, Rustam Inoyatov, Xolidjon Komilov, Qahramon Quronboyev, Valeriy Tyan va Aleksandr Farmanovning parlamentdagi faoliyati tugadi — ular Senatning avvalgi tarkibida tayinlangan senatorlar sifatida faoliyat olib borgan edi.
Kuzatuvchilarning ta’kidlashicha, hukumat a’zolarining senator etib tayinlanishi biroz g‘alati ko‘ringani bilan, aslida yangilik emas, ammo yangi Senat a’zolari qatorida, masalan, madaniyat vaziri Baxtiyor Sayfullayevning bo‘lishi uning yangi hukumat tarkibidan chiqarilishini, madaniyat vaziri o‘zgarishini anglatishi ham mumkin. Senatning qolgan uch a’zosi qachon tayinlanishi esa hozircha noma’lum.Avvalroq, 17-yanvar kuni O‘zbekistonning 14 ta hududidan olti nafardan senator saylangani haqida xabar berilgan edi. Yangilangan Senatning ilk majlisi 20-yanvarga belgilangan.
Izoh (0)